HISSLAM-in inkhawmpui an hmang

Higher Secondary School Teachers’ Association of Mizoram (HISSLAM) chuan, nimin khan Aijal Club-ah General Conference an hmang a, minister Lal Thanzara'n an hmanpui.

Lal Thanzara chuan, NEDP hnuaiah higer secondary zirna tichangtlung turin classroom siam belh nan cheng nuai 280 dah a nih thu leh lecturer 100 chuang dah ngheh an nih tawh thu a sawi a, "Principal Recruitment Rules pawh siam ṭha tura hmalak a ni," a ti.

Zirtirtute’n sikula an sawi chu in lamah lo tihdanglam a har thu sawiin Lal Thanzara chuan, "Zirtirtute'n in zirtir dan leh in sap ṭawng lam dante pawh in uluk a pawimawh," a ti a; zirtirtu hna chu sikul hung chungah a tawp mai loh thu a sawi.

Health Minister chuan, "HSSLC zirtirtute chu naupang kum 16-18 enkawltute an nih angin, tunlaia kan rama hluar em em HIV/AIDS leh zûk leh hmuam dona kawngah ṭhahnem ngai taka ram tan naupangte hnena zirtirna petu ni turin ka duh a che u," a ti bawk.

HISSLAM conference-ah hian National Award to Teachers, 2015 dawngtu H Ngurthansanga, Mamawii HSS leh State Awards for Teacher, 2015 dawngtu Lalthantluanga Tochhawng, GM HSS, Champhaite hnenah lawmpuina thuziak hlan a ni.

HISSLAM general conference hi an vice president C Laldinliana'n a kaihruai a, an president Vanlalzuata pawhin thu a sawi.