IFS kum 50 tlin lawm a ni

IFS, Mizoram Chapter chuan nimin khan State Forest Training Institute, Bethlehem Vengthlangah Indian Forest Service (IFS)-in all India service-a an kum 50 tlin an lawm a, chief minister Lal Thanhawla'n a hmanpui.

Chief Minister chuan, kum 50 chhungin IFS hnuaia thawkte'n ram tan, a bik takin ramngaw leh nungcha humhalhna kawngah ṭha tak thawkin an thawk a, kaihhruaina hnuaia hmasawnna tam tak ram pumin a nei tih a sawi a, "Mizorama Forests department chu district council hnuaiah tláwmtê aṭanga bul ṭanin, khatih laia thawktute inpekna leh thawhrimna avangin tun dinhmun hi a thleng a ni," a ti.

India anga ram ṭhang mek leh Mizoram anga sorkar hnathawk tamnaah sorkar hnathawkte'n thil an ti thei hle tih sawiin CM Hawla chuan, "Dik tak leh langtlang taka thawkin, mipuite hlâwk-na leh hamṭhatna atan kan thawk tur a ni", a ti a; sorkar hnathawkte chu thil reng reng a ṭha lama hertu leh thlentirtu nih tum ṭheuh turin a chah.

Chief Minister hian IFS kum 50 tlin puala lehkhabu buatsaih Mini Coffee Table Book ‘Mizoram Forest - Through the Year’ tih a tlangzarh nghal.

IFS golden jubilee lawmna hi PCCF Lalram Thanga'n a kaihruai a, IFS thi tawhte sûnna hun hman a ni. Jubilee lawmna atan hian AGMUT Cadre-a IFS officer, Mizorama thawk mekte'n an ni khat hlawh an thawh a ni.