Serchhip MJA-te'n pangang khawina an en

Serchhip District Journalist Association member-te chuan, nimin Chhingchhip Mualpui rama Integrated Sericulture Development Project hnuaia Sericulture Cluster Farm an tlawh a, hna an thawh dante an enfiah.

Serchhip MJA-te hi Serchhip district sericulture officer (DSO) V Zothansanga'n Ministry of Textile scheme, North Eastern Region Textile Promotion Scheme (NER-TSP) hnuaia Mizoram sorkarin Integrated Sericulture Development Project (ISDP) kum 2015 aṭanga a kalpui ṭan dan leh an district chhunga ISDP kalpui dante a hrilhfiah.

V Zothansanga tarlan danin, ISDP hnuaiah hian Serchhip district-ah chhungkaw 100 chu ṭanpuina pea silk thar chhuak tura hmalakpui mek an ni. Serchhip district-ah hian circle panga siam leh niin, Serchhip, Thenzawl, Khawlailung, Chhiahtlang leh Baktawng Circle tia ṭhen an ni a; MJA member-te'n nimina an tlawh Chhingchhip Cluster hi Baktawng Circle chhunga mi a ni.

Chhingchhip Mualpui Cluster-ah hian ram ṭín 13 hmunah pangang chaw (mulberry) chîn a ni a, chhungkaw 12-te'n kumin aṭangin test rearing (vulh chhinna) an nei a ni.