Mizoram MLA hlawh tipung tura din Study team rawtna siam hnâwl a ni

Mizoram Assembly session-ah November 22, 2019 khan MLA-te hlawh punna tur bill pass a ni. MLA-te hlawh punna tur hian General Purpose Committee (GPC)-in a ngaihtuah bingtu tur study team a din a, mahse, study team rawtna chu a vaia hnâwl a ni. GPC chuan member pathum awmna sub-committee a din bawk a, sub-committee rawtna chu GPC-in a pawm thung.

Mizoram MLA hlawh zat tur buaipuitu study team leh sub-committee rawtnaa a lan danin, MLA hlawh tisang tur hian speaker Lalrinliana Sailo kaihhruai GPC chuan study team a din a; study team-ah chuan Dr Kenneth Chawngliana, ex-speaker chu chairman a ni a, minister/MLA hlui pahnih PC Zoram Sangliana leh Sanghmingthanga H Pautu leh, Pachhunga University College-a Economic department-a assistant professor Lalthlamuana Ralte te chu member niin, Mizoram Legislative Assembly-a Additional Secretary chu associate member a ni.

Study team hi kumin August 28, September 4, 9, 25 leh October 10-ahte an ṭhukhawm a; Mizorama MLA hlawh zat leh tihpun dante leh state hrang hranga MLA-te hlawh thlir chungin an zir chianna leh speaker, deputy speaker, chief minister, minister, minister of state, opposition leader, deputy govt. chief whip leh MLA-te hlawhpui leh hamṭhatna dang pali leh pension hlawh zat tura an rawtnate chu October 10-ah GPC-ah an thehlut.

GPC chuan MLA hlawh chungchang ngaihtuahtu tur sub-committee a din leh a, deputy speaker Lalrinawma'n kaihruaiin, MLA pahnih Dr ZR Thiamsanga leh Zodintluanga Ralte te an tel. Sub-committee chuan study team report leh Former Legislators Association of Mizoram (FLAM) lehkha thehluhte October 21-ah an zir chiang a; chumi hnuah GPC-ah rawtna an thehlut ve leh bawk.

Study team rawtnate GPC leh a hnuaia sub-committee-in a hnâwl vek chungchanga zawhna chhangin study team member Lalthlamuana Ralte chuan, "Hmun dang aṭangin pressure a awm a, an ngai pawimawh zawk a nih ka ring. Theihtawpa kan zir chian hnuah kan thehlut a, keini tan vuina tur a awm lo," a ti.

MLA salary, sumptuary allowance, entertainment allowance, family allowance leh residence allowance atana study team rawtnate chu sub-committee chuan study team rawtna aia sang vekin a rawt a; residence allowance erawh chu study team rawtna aiin sub-committee rawtna a tlem zawk thung. Residence allowance hi man loa sorkar quarters luahtu MLA-te'n an dawng thei lo a, mahni ina khawsa leh mi in luahte'n an dawng thei.

Vanglaini zawhna chhángin Assembly Secretariat hotute chuan, Mizoram MLA-te hlawhpui (salary) Rs. 80,000 chu India ram state dangte leh India hmarchhak state-te nena khaikhinin a tam uchuak lo niin an sawi. 

Assembly Secretariat-in state danga MLA-te hlawh an zawhfiahnaa an chhinchhiah danin, MLA-te hlawhpui (salary) chu Arunachal Pradesh-ah Rs. 1,20,000, Sikkim-ah Rs. 90,000, Assam-ah Rs. 60,000, Meghalaya-ah Rs. 60,000, Nagaland-ah Rs. 50,000, Tri­pura-ah Rs. 24,210 leh Manipur-ah Rs. 19,500 a ni. 

MLA pension hlawh atan study team-in thla khatah Rs. 30,000 an rawt laiin, sub-com­mittee chuan Rs. 40,000 an rawt. Tun dinhmunah MLA pension la thei mi 113 an awm a, MLA pension atana study team rawtna leh sub-committee rawtna thla khata a tam zawkna chu Rs. 11,30,000 a ni a, kum khatah chuan Rs. 1,35,60,000 a tling.

Hetih lai hian, MLA pension lak tam theih ber chu study team rawtnaah Rs. 60,000 a ni a, sub-committee rawtnaah Rs. 70,000 a ni thung. MLA-ah vawi hnih thlan tlin an nih aṭangin pension hlawh Rs. 5,000 zelin a pung ṭhin a ni.