A nupui thattua puh man a ni

Bawngkawn Police-te chuan October 26, Pathianni khan H Lalromawii (31) d/o H Thangtinliana, Falkland Veng thattu ni ngeia hriat a pasal Zothanpuia (45) an man.

Police aṭanga Vanglaini thu dawn danin, October 26, 2025 chawhma dar 10 vel khan H Lalromawii hi an chenna inah thia hmuh a nih thu Bawngkawn Police-in an dawng. Police leh Forensic Science Laboratory-a mithiamte'n thihna thlenna hmun an pan nghal a, ruang an endik hnuah thah a ni ngei tih finfiah a ni.

H Lalromawii hi a lu-ah vuakna avanga kak a awm a, a taksa hmun hrang hrangah sawisakna duk leh pem eng emaw zat a awm bawk.

Thil thleng chungchangah hian H Lalromawii pasal Zothanpuia chu Bawngkawn Police-te'n an man nghal a, thu an zawhfiah hnuah a thah ngei a nih thu Zothanpuia chuan a sawi. Thu zawhfiah atan an ṭhenawma hmeichhe pakhat pawh police-in an la a, an la kawl. Inthahna hi hi mipat hmeichhiatna lam kaihhnawih vang nia hriat a ni.

H Lalromawii leh Zothanpuia te nupa hian fa pali an nei a; H Lalromawii ruang hi Civil Hospital, Aizawl-ah endik a nih hnuah an khua Kawlbêmah vui tura lak a ni.