KHAWTHLIR
Vigilance Week
Sorkar laipuia Central Vigilance Commission chuan Vigilance Awareness Week atan October 27 - November 2, 2025 a puang a, hemi pual hian nimin khan GAD secretary Sudhir Kumar kaihhruaiin Mizoram Secretariat kawtah Secretariat-a thawktute’n eiruk dona thutiam an sawi rual. Kumina Vigilance Awareness Week thupui chu ‘Vigilance: Our shared responsibility’ tih a ni.
Rilru hrisel zirho
Zoram Medical College & Hospital (ZMCH)-a Department of Psychiatry chuan nimin khan World Mental Health Month pualin ZMCH-a MBBS zirlaite tan rilru hrisel inzirtirna, Mental Health Awareness an buatsaih. zirhonaah hian clinical psychologist Lalawmpuia'n rilru hrisel chungchang a sawifiah a, zirlaite'n rilru hrisel nei turin thu an tiam. World Mental Health Month pual hian MBBS zirlaite chuan poster making competition an buatsaih bawk.
Kawng khar dawn
Aizawl Traffic SP Ruatsanga Ralte chuan hriattirna chhuahin, CR Law Firm aṭanga Ebenezer Medical Center inkar kawngah tuichhe paihna pipe phûm a nih dawn avangin, naktuk Nilainni zan dar 9 aṭanga Ningani zing dar 5 thleng kawng khar a nih dawn thu a tarlang.
Mihringa sumdawn chungchang zirho
Mizoram State Commission for Women leh National Commission for Women, New Delhi ṭang dun chuan nimin khan Champhaia Circuit House conference hall-ah 'Anti Human Trafficking Awareness/ Capacity Building' an buatsaih. MHIP leh MUP sub-hqtrs aiawh te, zirlai te, Champhai College zirtirtu te, DCPU office, One Stop Centre, Shakti Sadan, District Court leh IPR department hotute an tel a; mihringa sumdawnna leh a dona chungchang inzirtir a ni.
Minister-in hmanpui
Minister Vanlalhlana chuan nimin khan a bial chhunga Mizoram Upa Pawl (MUP), Durtlang Branch diamond jubilee lawmna a hmanpui a, jubilee lungphun hawngin, souvenir a tlangzarh. M Suaka Hall-a inkhawmah hian Vanlal-hlana chuan, MUP chu ram innghahna pawl a nih thu sawiin, "Upate hi hnam ro hlu an ni a, ram leh hnam hmasawnna atana thurawn pe zel tur leh ṭhalaite kaihruaitu ni turin ka sawm che u a ni," a ti.
Secretary chanpual sîksawi
Mizoram sorkar chuan tun hnai khan secretary pathum - Vanlaldina, V Lalsangliana leh Dr YLN Reddy te enkawl department a sîksawi. Vanlaldina chu Finance le Planning a chang chhunzawm dawn a, secretary to CM pawh a la ni zui zel dawn a, Tourism department pek belh a ni. V Lalsangliana'n Tourism chang tawh loin, PWD a chang thar a, Sports & Youth Services a chang zui ang. Dr YLN Reddy chuan Vigilance bakah DPAR-ah GG&TW a chan belh dawn a, hei hi K Lalthawm-mawia chan ṭhin a ni.
By-election atan inpuahchah
Dampa bial MLA by-election neih turah ngawrh takin inpuahchah a ni. Nimin khan general observer MT Reju hoin inthlannaa hman tur EVM leh VVPAT thliarna (randomisation) thawh hnihna neih a ni a, inthlan kaihhnawih sorkar hotute bakah political party hrang hrang aiawhte an tel. Dampa biala polling station 41-a hman tur EVM leh VVPAT 82 chu khawl hmanga thliar a ni. Nimin vek khan expenditure observer Shyam Kumar hoin candidate-te sum hman dan enfel thawh khatna neih a ni a; candidate-te sum hman danah felhlel leh dik lo hmuh a nih loh thu sorkar thuchhuahin a tarlang.