Sorkar lehkha pawimawh nei ngam lo zingah tun hnua neih leh tum an tam

Lawngtlai District Coordination Committee for Civil Registration System of Births & Deaths chuan nimin khan an chairman Donny Lalruatsanga, bawrhsap kaihruaiin piang leh thi chhinchhiahna lehkha (birth/death certificate) chungchang an sawiho. Aadhaar card, ration card leh birth certificate nei ngam lo zingah tun hnua neih leh tum an tam thu tarlan a ni.

Donny Lalruatsanga chuan, certificate pek chhuah chungchangah fimkhur thar a ṭul thu a sawi a, "Local registrar-te fimkhur thar a ngai a, a bik takin VC leh YLA ten hriatpuina lehkha siam an uluk thar a ṭul. Dik lo taka certificate siam an awm ṭhina hriat a ni a, dik lo taka certificate siam ṭhinte chungah na takin hremna kenkawh a ni dawn," a ti.

India mi ni lote hnenah birth certificate pek a nih tawh chuan India khua leh tui nihna an nei dawn tih sawiin Bawrhsap chuan, "Dik lo taka hman theih a nih avangin fimkhur a ṭul. Kum 2023-a sorkar thuchhuak awm tawh angin mipuite'n digitised birth certificate neih vek a hun tawh," a ti a; Mizoram pawnah chuan digitised birth certificate dil zel a nih avangin chak zawka pe chhuak turin a ṭul anga hmalak a nih tur thu a sawi.

Tarlan danin, local registrar-te'n delay birth certificate an pe chhuak thei tawh lo a, pe chhuak man chhuahte chu hrem ṭhin a ni. Aadhaar card, ration card leh birth certificate nei ngam lo zinga tun hnua neih leh tum an tam a, document ngai angte an neih si loh avangin harsatna an tâwk nasa a ni.

Ṭhutkhawmah hian, dik lo taka birth certificate pe chhuak ṭhinte lakah khauh zawka hmalak an rêl a; Lawngtlai district-ah chak zawka digitised birth certificate pek chhuah a nih theih nan Mizoram sorkarah harsatnate thlen ni se, an ti.