Book Nest Initiative lehkhabu vailiam

Lunglei Book Nest Initiative hnuaia Lungsen Aspirational Block-a zirlaite tana lehkhabu khawn khawmte chu Lungsen Block chhunga sikul hrang hranga sem tur chu nimin khan district bawrhsap Navneet Mann leh Lunglei Sub-Headquarters YMA president K Lalfakzualate'n DC pisa kawt aṭangin an vailiam.

Book Nest Initiative hnuaiah hian Lunglei khawpui chhunga YMA branch 19-te'n lehkhabu 11,034 an khawn chhuak a, Lungsena YMA branch pathumin lehkhabu 22, UDPA department aṭangin lehkhabu 312 leh AstroScape neitu Aryan Mishra hnen aṭangin lehkhabu 106 khawn khawm a ni bawk a; a vaiin lehkhabu (zirlaibu, thawnthu) 11,474 hmuh a ni.

Lehkhabute chu Lungsen RD Block-a primary school 27, middle school 27, comprehensive school pathum, high school pathum leh higher secondary school pakhatah sem a ni dawn a; heng sikulahte hian lehkhabu chhuar (bookshelf) siam vek a ni tawh.

Lunglei DC conference hall-a lehkhabu vailiam puala inkhawm buatsaihah bawrhsap Navneet Mann chuan, Book Nest Initiative chu NITI Aayog hnuaia Aspirational Block Programme hmalakna leh Nasha Mukt Bharat Abhiyaan hnuaia ruihhlo do beihpui thlak tihhlawhtlinna pakhat a nih thu a sawi a, "Ṭhalaite'n ram hmelma ruihhlo buaipui loa zirna leh nunphung hrisel an ûm zawk theih nana zirtirte chu a tum ber a ni," a ti.

Lehkhabu vailiamna inkhawmah hian Lungleia lehkhabu khawn chhuak ṭha zual veng pangaa YMA branch-te leh self help group-te hnenah lawmman hlan a ni a; YMA branch leh SHG tel zawng zawng hnenah lawmman pek a ni bawk.