Minister leh department hotute inkâwm

Information, Public Relations, Printing & Stationary (IPRPS) minister B Lalchhanzova chuan nimin khan IPR Lianchhiari Rûn conference hall-ah IPRPS department hotute a kâwm a; IPR leh Printing & Stationery dinhmun, hmalakna leh hmachhawpte a sawipui.

B Lalchhanzova chuan, IPRPS department chu mipui nena innghêng reng leh sorkar hlimthla tilangtu a nih thu a sawi a; ram leh hnam hmangaihna leh mipui tana rawngbawlna rilru pu a, mahni zâwnah ṭheuh theihtawp chhuah turin a fuih.

IPRPS Minister chuan, officer-te chu Mizoramin anmahni lo chu mi dang a nei chuang lo tih hre reng tura chahin, lungrual taka mipui rawngbawl hna thawhpuiah a sáwm a, "Sorkar chuan langtlang leh mawh la ngam, mipui tlûk luhna tlâk inrelbawlna leh hmasawnna chhawp chhuah a duh a ni," a ti.

Ṭhutkhawm hi IPRPS secretary Betsy Zothanpari Sailo-in a kaihruai a; IPR director K Vanlalsangi leh joint director Malsawmsanga te, Printing & Stationary controller Benjamin Lalzama leh principal cum project manager Vanlalmuanchhana ten an hmalakna leh hmachhawpte an sawifiah. Minister hian department hmunhmate fangin, hna thawh dante a en nghal a ni.