Hulhliap SSC thawh 5-na ṭan a ni

Ruihhlo ngaite enkawlna Hulhliap Short Stay Centre thawh ngana chu nimin khan Synod Revival Camping Centre, Sihphir Neihbawihah ṭan a ni a, mi 120 chuang an lut.

Mizoram sorkar, Mizoram Synod leh Central YMA ṭanghoin ruihhlo ngaite enkawlna an buatsaih ṭhin Hulhliap SSC thawh nganaah hian camping neihna tur pan hmain CYMA Hall leh Bawngkawn YMA Hall-ah ruihhlo ngai lut turte thlahna leh infuihna hun hman a ni.

CYMA Hall-ah inkhawmah hian Mizoram Youth Commission chairman Malsawmzuala Ralte, Excise & Narcotics joint commissioner Peter Zohmingthanga leh CYMA aiawhin Roneihthanga ten fuihna thu an sawi. Bawngkawn YMA Hall-a inkhawmah Social Welfare joint secretary Zonunthari leh MSDRB chief executive officer Lalhlupuii Sailo ten thu an sawi thung.

Fuihna inkhawm hman zawhah bus hmangin Hulhliap SSC neihna hmun tur Synod Revival Camping Centre panpui an ni a; Centre director Ruth Vanlalsawmi leh hotu dangte'n an lo dawngzawng a ni.

Hulhliap SSC hian ni 20 a awh dawn a; damdawi lam thiamte leh rilru lam thiamte'n an enkawl dawn bakah, Pathian thu nen enkawl an ni ang. Hulhliap SSC batch hmasa lama chhuak tawh mi eng emaw zat chu kut themthiam zirna (skill development trainning) neihpui tawh an ni a, sorkar aṭanga certificate dawngin, mahni kea dinga eizawnnna bul ṭan pawh an awm tawh a ni.