Sports Games medal-in sorkar hnaah Awmzia a nei dawn - Sports Minister

Mizoram State Sports Games (MSSG)-a discipline ṭhenkhat chu nimin khan khelh ṭan a ni a, a hawnna inkhawm erawh chu December 9, 2019-ah neih a ni ang. Sports & Youth Services minister Robert Romawia Royte chuan, MSSG medal-in sorkar hna lakah awmzia a neih dawn thu a sawi.

SYS Minister hian nimin khan a pisaah thuthar thehdarhtute a kâwm a; State Games chu official-in December 9-13 chhunga neih tur ni mah se, games dang ang thoin discipline ṭhenkhat chu nimin khan khelh ṭan a nih thu a sawi a, "Official chuan December 9 tlai 3:30-ah chief minister Pu Zoramthanga'n Rajiv Gandhi Stadium-ah a hawng ang. State Games hi Mizoram state puitling a nih hnua a vawi khatna tur a ni," a ti.

Robert Romawia chuan, State Games chu department mal anga tih chi a nih loh avangin Council of Ministers an ràwn thu sawiin, "Tunah hian Council of Ministers remtihna thlapin kan buatsaih dawn. MLA-te an constituency committee-a chairman ni turin kan sáwm a, an pawm vek a ni," a ti a; chhuanlam siam miah loa MLA-te'n State Games atana theihtawp an chhuah avanga an lawm thu a sawi.

Assembly-a General Purpose Committee (GPC)-te'n MLA fund hman dan enṭhain, sport atana hman an phalsak tawh thu sawiin Minister chuan, "In­fiamna ngai pawimawha GPC-in hetiang thutlukna a siam hi Sports Minister ka nih angin infiammite leh infiamna buaipui ṭhinte aiawhin lawmthu ka sawi a ni," a ti.

Sports Minister chuan, tun hnaiah Mizoram sorkarin notification chhuahin, sorkar hna lâk (direct recruitment)-ah 5% chu infiammite tan dah a nih thu a sawi a, "State dangah chuan hetiang hi an tihna a rei tawh ang. Mizoramah chuan kan nawr a, kan hlawhtling thei lawk lo. Tunah hetianga thutlukna siam a ni ta hi a lawmawm hle a ni," a ti. Zawhna chhanga SYS Minister sawi danin, State Games-a medal dawngtute hnenah a sum fai sem a ni dawn lo a, sorkar hna laka 5% reservation-ah ­erawh awmzia a nei dawn. Aizawl khaw páwna infiammite chu an chak chhung zawng ni tin dearness allowance (DA) Rs. 150 leh an chak loh hnuah ni khat pek zui an ni dawn a, Aizawl khaw chhunga mite chu DA Rs. 100 pek an ni ang. Sports Minister-in thuthar thehdarhtute a kawmnaah hian State Games puala t-shirt siam leh hlapui, Rosang­liana (Zorock) phuah chu tlangzarh a ni.