Mizoram UPC general superintendent atan Rev. C Lalremsanga an thlang

Mizoram UPC rorelna sang Executive Committee ṭhutkhawm vawi 60-na chu nimin khan Mizoram UPC hmunpui, Tuikhuahtlanga conference hall-ah ṭan a ni a, vawiinah an chhunzawm ang. Mizoram UPC general superintendent thar atan Rev. C Lalremsanga an thlang a, mi 19 hnenah ministerial licence an pe.

UPC (Mizoram) Executive Committee meeting hi executive chairman Upa Andrew Laldingliana'n a kaihruai a, district hrang hrang aiawh pastor, upa leh tirhkoh mi 67 an tel. Puipa zinga term hmang zo - general superintendent Rev. Vanlalsipaia leh general secretary Rev. H Lalrawnkima te aiawh tur an thlang a; general superintendent atan Rev. C Lalremsanga, Chaltlang leh general secretary atan Rev. HC Lalthlamuana, Siaha te an thlang a ni.

Southern Zone area secretary atan Rev. Ngurthanpara Sailo, General Missions depart-ment chairman atan Upa Sawihlira, secretary atan Rev. PC Lalṭanpuia leh treasurer atan Upa K Rosangzuala te an thlang a; Pastoral Board-in fixed pay pastor tur mi pali interview kaltlanga a lakte chu an pawmpui bakah, pastor paruk hnenah ordination licence an pe bawk.