Chief Minister-in sorkar laipui hotute a kâwm

Chief minister Zoramthanga chuan Thawhṭanni leh nimin khan New Delhi-ah sorkar laipuia hotute a kâwm a, Mizoram mamawh thil chi hrang hrang a sawipui.

Sorkar thuchhuah tarlan danin, CM Zoramthanga hian Thawhṭanni zan khan Union Home minister Amit Shah chu a chenna inah a kâwm a; Citizenship Amendment Bill (CAB) chungchang te, Mizoram tana all India service cadre hran neih, The Mizoram (Maintenance of Household Register) Bill 2019, Tripura-a Bru raltlan, Aizawl khawpui laili aṭanga Assam Rifles sawn chhuah chungchangte a sawipui a ni.

Ministry of DoNER leh North Eastern Council (NEC)-a budget tam zawk dah, CSS hnuaia Hindi zirtirtu, Zoram Medical College leh Home department mamawh hrang hrangte a sawipui bawk. CM Zoramthanga thu thlente hi Union Home Minister chuan a lo en zui tur thuin a chhangin niin Mizoram sorkar thuchhuah chuan a tarlang.

Zoramthanga hian Thawhṭanni vêk khan DoNER minister Jitendra Singh chu a chenna inah a kâwm bawk a; India hmarchhak state-te tana DoNER leh NEC-te'n nasa zawka hna an thawh theih dan turte leh hnathawh tura rawtnate a thlen.

CM Zoramthanga chuan nimin khan Jal Shakti minister Gajendra Singh Sekhawat pawh a pisaah a kâwm a; Mizoram mipuite'n Jal Jeevan Mission hnuaia tui thianghlim hnianghnâr taka an dawn theih dan tur a sawipui a ni. Gajendra Singh Sekhawat chuan, Jal Jeevan Mission hnuaia Mizoram hmalakna chu fakawm a tih thu leh, mamawh hrang hrang an la neihte chu state mila project siam tura hrilhin, a lo en zui tur thu a sawi niin sorkar thuchhuah chuan a tarlang.

Zoramthanga chuan nimin vêk khan Airport Authority of India hotute a kâwm a; Lengpui Airport tihchangtlun dan tur, thlawhna tam zawk thlawhtir dan tur leh bungraw phur thlawhna thlawhtir dan turte a sawipui a ni. Chief Minister hi Lok Sabha MP C Lalrosanga, State Planning Board vice chairman H Rammawi, chief secretary Lalnunmawia Chuaungo leh sorkar official dangte'n an ṭawiawm a ni.