KHAWTHLIR

Thisen pe

Inrinni khan Electric Veng Branch YMA chuan an branch golden jubilee lawm nan blood donation camp an huaihawt a, Aizawl Civil Hospital tan mipa mipa 35 leh hmeichhia pathumin thisen unit 38 an pe. Hunthar Veng Branch KṬP-in an din champha pualin Synod Hospital tan mipa 20 leh hmeichhia pathumin unit 23 an pe a; Leitlangpui Sailo Facebook group member-te'n Lunglei Civil Hospital-ah unit sarih an pe bawk.

Lehkhabu tlangzarh

Rev. Lalramliana, Luangmual West lehkhabu ziah 'Bible hriatna hlu' tih chu Inrinni khan Zosaphluia Building, Mission Vengah Synod senior executive secretary Rev. Lalramliana Pachuau-in a tlangzarh a; 'Mitdel mitvarna' (Hranglamthanga hla phuah thiam chanchin leh a kamchhuak Pathian thu) tih lehkhabu chu Rev. Vanlalzuata'n a tlangzarh bawk.

Mei zu man

Lawngtlai Anti Tobacco Squad chuan Inrinni zing khan Lawngtlai Bazarah squad drive an nei a; phal lohna hmuna mei zu mi 14 manin, dan angin pawisa an chawitir nghal. Sorkar thuchhuah tarlan danin, tun dinhmunah Lawngtlaiah puipunna hmuna meizûk a la hluar hle a ni.

Meth man

Aizawl SP hnuaia District Special Branch (DSB) chuan Inrinni khan Chanmari, Aizawlah Metamphitamine mûm 10,021 leh a neitua puh David Vanlaltluanga (38), Chanmari, Aizawl nia insawi an man. DSB hian Meth hi Chanmari-Chaltlang road-a motor chhunga a leitu tur hnena an inhlan chhawng tur nangchingin an man a ni.

Jubilee lawm

Dinthar Veng Joint Action Committee chuan November 25, 2016 zan khan an veng YMA Hall-ah an kum 25-na, silver jubilee an lawm a, bialtu MLA Lalruatkima'n a hmanpui.

Rualbanlote Ni

Nimin kha Mizoram Baptist Kohhran ni pawimawh, 'Rualbanlote Ni' a ni a, he ni pual hian Baptist tualchhung kohhran tinah chawhma inkhawmah hun hman a ni. Rualbanlote Ni thupui chu 'Miin i chunga an tiha i duh tur ang apiang chu, mi chungah pawh ti ve rawh u' tih a ni.