KHAWTHLIR

National Programme for Control of Blindness & Visual Impairment (NPCBVI), Lawngtlai district chuan December 2, Thawhṭanni aṭang khan Chawngte damdawi-in (Community Health Centre)-ah Eye Camp an buatsaih a, ni sarih chhung a awh dawn. Mi eng emaw zat an inentir a, eye surgeon Dr Zoremmawii, Kolasib District Hospital leh a thawhpuite'n endikin, zai ngaite an zaisak nghal a ni.

CK Hyundai, Bawngkawn chuan anmahni dawrtute chunga lawmthu sawi nan nimin khan Aizawl Civil Hospital tan thisen unit 18 an pe a, petute mipa 16 leh hmeichhia pahnih an ni.

Mizoram sorkar chuan nimin khan notification ti chhuakin deputy commissioner ṭhenkhat a siksawi. Serchhip DC ni lai Sangchhin Chinzah chu Kolasib DC-ah sawn a ni a, Kolasib DC ni lai Zoengsanga chu LAD director-ah sawn a ni. Rural Development leh Commerce & Industries addl. secretary ni lai V Lalsangliana chu Serchhip DC-in a awm ang.

Mizoram Planning, Economic & Statistical Service (MPESS) officer-te chuan nimin khan Planning department conference hall-ah 'Refresher course training' an nei a, Mizoram Youth Commission (MYC) chairman Dr Vanlal-

ṭanpuia, MLA-in a hmanpui. Dr Vanlalṭanpuia chuan, MPESS officer-te chu sorkar hmalakna kawng hrang hrangah ṭha-hnemngai lehzuala mawhphurhna hlen turin a fuih. He hunah hian Planning secretary Dr C Vanlalramsanga'n 'Government’s role in managing the economy' thupui a sawi a ni.

Apuia Tochhawng lehkhabu ziah, 'Vanhnuailiana leh a pasalṭhate vanglai' tih chu nimin khan Aizawl Press Club-ah Vanhnuailiana tupa Lalrengpuia Sailo, Chanmari West-in a tlangzarh.