Sorkar aiawhte'n Gujarat kalphung an zir

Mizoram High Level Team chuan November 24-25, 2016 chhung khan Gujarat an tlawh a; contract farming, cooperative movement leh entrepreneurship development an kalpui dan an zir chiang.

High Level Team hian November 24 khan Shivpura Kampa khuaa Pepsico company-in contract farming a kalpui dan te, ICT leh Balaji company-te'n cold storage hmanga thlai an sawngbawl leh hralh dan te, Vadrad khuaa Centre for Excellence for Vegetables-te hna thawh dante zir a; an hotute leh thawktute nen an inkâwm a ni.

Gandhinagara Secretariat Sachivalaya-ah High Level Team-te chuan Gujarat Agriculture minister CD Shapariya an kâwm a; Agriculture & Cooperation Secretary-in contract farming leh cooperative movement kalpui dan a lem nen a hrilhfiah.

November 25 khan High Level Team hian Isanpur Kota khuaa Primary Agriculture Credit Society tlawhin, an hnathawh dante an en a; lo neitute'n cooperative ruahmanna an hman ṭangkai dan an zawtfiah. Chumi hnuah Ahmedabad-a District Central Cooperative Bank an tlawh leh bawk.

India leh khawvel huapa cooperative movement hlawhtling bera ngaih Anand-a Anand Milk Union Limited (AMUL) hmunpui an tlawh bawk a; AMUL hotute'n High Level Team chu lo dawngsawngin, hna an thawh dante an hrilhfiah.

Mizoram High Level Team-te hi Finance minister Lalsawta'n a ho a; Horticulture minister PC Lalthanliana, AH&Vety minister Ngunlianchunga, Planning Board vice chairman H Liansailova leh sorkar official leh tlawmngai pawl aiawhte an tel a ni.