Sorkar hnathawk leh an laináte Sorkar dodal lo tura hriattir an ni

Lunglei DC Lalzarmawii chuan tun hnai khan circular a tichhuak a; an district chhungah sorkar hnathawk bakah, an laina hnaite chu sorkar dodal zawnga thil tihnaa tel lo tura hriattir an nih thu a puang. Hetih lai hian, sorkar circular hi siamṭhat leh an tum nia thu dawn a ni.

Lunglei DC circular chuan, "Kan hriat angin, tun hnai maia sorkar hnathawk ṭhenkhatte an tu leh fate leh an laichìn hnaite sorkar dodal zawnga chêtna leh thil tihah an tel ṭhin tih hriat a ni a, a pawi hle a ni. Hetianga sorkar hnathawkte sorkar kalh leh do zawnga chetna hi Conduct Rules kalh tlat thil a nih avangin sorkar hnathawkte'n tih loh tawp tur a ni," a ti.

Tun hnuah sorkar hnathawk, an tu leh fate leh an laichìn hnaite sorkar dodal chetna reng reng an tel ve tur a nih loh thu tarlangin Lunglei DC chuan, "Sorkar hnathawkte tan a pawi mai bakah, an tu leh fate school/college kal laite tan hun lo kal zel turah hna zawnaahte leh career tichhia leh tibuai thei thil pawi a thleng thei a ni," a ti a; sorkar hnathawk zawng zawngte leh an laichìnte chu sorkar dodal zawnga che lo tura ngen an nih thu a tarlang.