CM leh IIMC DG an inkâwm

Chief minister Lal Thanhawla leh Indian Institute of Mass Communication (IIMC) director general KG Suresh te chu, nimin khan CM banglaah an inkâwm.

KG Suresh chuan, Mizoram University campus-a IIMC North East campus sak mek chu 46% zawh a ni tawh tih sawiin, nakkum October thlaa peih hman a nih hunah an hnathawh pêng pakhat atana Asia chhimchhaka chanchinbumite tan training centre buatsaih an tum a, sorkar laipuia ministry pawhin a thuphunga an remtih tawh a sawi.

Eng sorkar tan pawh chanchin puanzarna leh public relation a pawimawh thu sawiin IIMC DG chuan, "Mizoram sorkar hnuaia thawk IPR officer-te tan tunlai thiamna mila zirtirna leh training an buatsaih theih a ngai," a ti.

Chief Minister chuan, IPR officer-te tana training buatsaih chu ṭha a tih thu sawiin, department hotute a sawipui tur thu IIMC DG a hrilh a ni.