Hnam Rûn aṭangin AMC an thunun - Lal Thanhawla

MPCC president Lal Thanhawla chuan, Aizawl Municipal Council (AMC) chu Mizo Hnam Rûn aṭanga thunun niin a sawi a, "MNF chauhin an chan theih nana control an ni," a ti.

Aizawl West-III Block Youth Congress-in Inrinnia mi thar lawm luh inkhawm, Lawipu khelmuala an buatsaih a hmanpuinaah Lal Thanhawla chuan, "MNF-in AMC-ah sorkarna an chan hnuah mipuite tana hamṭhatna awmte an party mi leh sate chauhin an chan theih nan Hnam Run aṭangin an control ṭhin," a ti a; Congress chuan AMC-a sorkarna an chan laiin an party mite'n hamṭhatna hûi vek an tum loh thu a sawi.

MPCC President chuan, Congress sorkar kal liam ta leh sorkar kal mek chu party dangte'n sawiselna tur an hre lo niin a sawi a, "Party ṭhenkhat hruaitute'n an rinthu an sawi a, dâwt hmanga min puhchhiat tawh lona tur leh an hmui tihchîp nan Court-a kal mai a la ṭul ang. Congress party chu miretheite hmangaihtu an nih angin party-ah an buai lo," a ti.

Ṭhalaite tana khawvel thar buatsaihsak tura thu an lo tiam tawh chu bawhzui zel a nih thu sawiin Lal Thanhawla chuan, "Sorkarna kan siam hnuah khelmual ṭha tam tak siam a ni tawh. Mizo ṭhalaite sipaiah a tam thei ang ber ṭantir turin hmalakna kalpui mek a ni," a ti a; sorkar hmalakna avangin Mizo ṭhalai tam tak sipaiah an luh tawh thu a sawi.