Kumin January - October chhungin ACH pantu mi 3,67,105 an tling tawh
Mizoram Journalists' Association (MJA) Gen.Hqrs. hruaitute leh Aizawl Civil Hospital (ACH) hotute chu medical superintendent Dr Lalhmuchhuaka pisaah an inkàwm a, damdawi-in dinhmun leh hmalaknate an sawiho. He hunah hian, kumin (2019) chhungin ACH pantu mi 3,67,105 an awm tih tarlan a ni.
ACH hotute sawi danin, ACH Out Patient Department (OPD)-ah kumin January-October chhungin ACH OPD-a inentir mi 3,29,106 an awm a, chu'ng zinga 250,856 chu inentir thar (case thar) an ni a, inentir mek (case hlui) mi 1,16,249 an ni. Casualty/emergency pantu mi 37,999 an awm a; chu'ngte nen chuan kumin thla 10 chhunga ACH pantu mi 3,67,105 an awm.
OPD pantu zinga mi 11,007 leh casualty pantu zinga mi 775 chu damdawi-inah admit an ni a, OPD leh OPD pantu ni lote nen ACH-a admit tawh zawng zawng chu mi 68,700 an ni. Damdawi-in khum zinga 84.53% chu eng lai pawha luah khah reng ang a ni bawk.
January-October chhung vêkin ACH-a investigation ti leh a kaihhnawiha laboratory pantu mi 7,72,464 an awm a; Mizoram pawn pan tura tih (refer) mi 2,156 awmin, mi 14769 zai an ni. Nau piang 3,618 awm tawhin, mipa 1,857 leh hmeichhia 1,761 an ni a, chutih laiin, mitthi 536 an awm.
ACH medical superintendent Dr Lalhmuchhuaka chuan, ACH chu damlo a mamawhtute tana pan manhla ni turin theihtawp an chhuah tih a sawi rualin, tih dik loh leh famkim tâwk lohna an nei ang tih an rin thu a sawi a; vaihlo zûk leh hmuam khuahkhirhna leh damdawi-in vawn fai kawngahte mipuite fimkhur leh zual se an duh thu a sawi a ni.
MJA hruaitute zawhna chhangin Dr Lalhmuchhuaka chuan, Trauma Centre dinna tur chu hna thawh theih turin an peih hnai tawha an hriat thu te, staff quarters tur ram an neih mumal tawh loh avangin tihngaihna a awm tawh loa an hriat thu leh, tunah hian quarters tiha chhàl tham meuh loh room pariat, tê tak tê tête chu emergency thil tak taka duty turte awmna an neih a nih thu a sawi bawk.
MJA president Zonunsanga Khiangte chuan, ACH chu MJA-te'n inti neitu taka an en ṭhin a ni tih sawiin, "A chhiat a ṭhat kan lo ngaihvenpui a, kan vènpui ṭhin. Thawhhona ṭha tak neih zel kan duh. ACH hi MJA-in kum tina charity fund kan khawn aṭangin Hospital Poor Fund-ah kan hlan ve ziah ṭhin a ni," a ti.