MPCC-in Dr Lal Thanhawla an lo hmuak
Chief minister hlui leh MPCC president Lal Thanhawla chu Serampore College (University)-in Doctor of Divinity an hlan hnuah nimin khan Mizoramah a rawn haw a, Congress party mite'n Lengpui Airport-ah an lo hmuak a, Pathian hnena lawmthu sawina hun an hmang.
Lengpui Airport-a Lal Thanhawla hmuahna inkhawm hi MPCC general secretary RL Valla'n a kaihruai a, MPCC aiawhin general secretary K Lianzuala leh chhungkaw aiawhin Lal Thanzara ten thu an sawi. K Lianzuala chuan, Lal Thanhawla'n Serampore College aṭanga doctorate degree a dawng chu Congress party bakah, Mizoram pum tan thil ropui tak a nih thu a sawi a, "Amah hre chiang lote'n sawisel ṭhin mah se, amah hre chiangtu Pathianin a hun takah a chawimawi a ni. Pu Lal Thanhawla hi India rama Kristiante leh hnam tênaute thlavâng hauh ṭhintu, khawtlang leh ram tana thawh hlâwk tak a ni," a ti.
Lal Thanzara chuan, a ú hnena a phû loh chawimawina Pathianin a pe chu an lawm thu sawiin, "Nikum lawkah MLA election-ah mualpho taka tlain, rilru hrehawm taka kan chhungkua kan awm laia hetiang chawimawina hlu tak kan dawng hi kan lawm tak zet a ni," a ti a; Lal Thanhawla chu mi hrang hrangin an lawmpui tih sawiin, chief minister Zoramthanga'n lawmpuina leh duhsakna a hlan avangin an lawm tak zet thu a sawi. Tarlan tawh angin, Serampore College chuan November 30, 2019 khan Hyderabad-a an convocation-ah Lal Thanhawla hnenah Doctor of Divinity a hlân a; a hming bulah doctor (Dr) tih ziaha sawi tel theih a ni ta a ni.