LADC thlasik ṭhutkhawm ṭan a ni Budget pass duhin LSA-in kawng zawh

Lai Autonomous District Council (LADC) thlasik ṭhutkhawm chu nimin khan Lawngtlaia LADC Session Hall-ah an ṭan a, chairman V Zirsanga'n a kaihhruai. Hetih lai hian, LADC budget pass a nih theihna atan Lai Students Association (LSA) chuan nimin khan Lawngtlaiah kawngzawh an huaihawt.

LADC session-ah hian chief executive member (CEM) T Zakunga chuan kum 2019-20 atana LADC budget cheng nuai 19,253.94 a pharh a, chhiah tlingkhawm aṭanga hmuh tura beisei chu cheng nuai 210 a ni. Session ṭan a nih hma hian LSA chuan LADC budget pass a nih theih nana MDC-te ngenna an kalpui mek bawhzuiin, Areopagy aṭangin LADC Session Hall kawt thleng kawng an zawh a; budget pass an duh thu an tlangaupui a ni.

July 2019 khan LADC budget session neih laiin sorkar rin tâwk lohna motion put luh a nih avangin budget pass theih a ni lo a, tun ṭum session-ah hian LSA chuan budget pass a nih theih nan MDC-te chu hma la turin an lo ngen tawh a ni. LSA president F Vanlalruatpuia chuan, LADC budget pass a nih loh avang­in sum tam tak Council-in a hmuh tur a hmu thei lo tih a sawi a, "Hei vang hian hmasawnna beisei angin a kal thei lo. Ram hruaitute'n budget hi pass phawt se, politics vir vel­ah tih duh dang an nei a nih chuan, budget pass hnuah ti mai se tih chu LSA ngaihdan a ni," a ti.