School Education harsatna sawiho a ni

Nimin khan Education Centre confe­rence hall-ah School Education department hnuaia hatsatna leh chinfel ngaite sawiho a ni a; School Education minister Lalchhandama Ralte-in a hmanpui. Minister chuan, thuneitute hriatpuina leh phalna la hmasa loin páwn lam mite huaihawt programme-ah sikul naupangte chhuahtir phal a nih loh thu a sawi.

Lalchhandama Ralte chuan, School Education department chu Mizo­ram sorkar hnathawk zinga 30% vel thawhna a ni tih sawiin, "Heti zozaiin ṭan kan lâk chuan kan ram hmélhmang a tidanglam thei ang," a ti a; zirtirtute chu sorkar hnathawk dang aia hna zahawm thawk an nihna vawng nung tur leh, an tih tur leh tih loh turte hre chiang turin a chah.

Sorkar sikulah zirtirtu indaih lohna a nasa tih sawiin Minister chuan, "Elementary lamah MR teacher kan lak avangin a ziaawm ta deuh a, high school lamah indaih lo tak tak an la tam hle. Thing­tlangah class la thei tal sikul tinah awm se tih sorkarin a duh laiin, khawpuia luh dil an tam hle a ni," a ti.

Lalchhandama Ralte chuan, School Education-ah officer an indaih loh avangin SDEO post ṭhenkhat chu luahtu an awm lo a, mi dangin an kawp ngai tih sawiin, "Hemi chingfel tur hian Mizoram Education Service thlir mek a ni," a ti a; MES tihhlawhtlin nan association hrang hrangte chu inhlan ṭhen a ngai a nih pawha inhuam turin a sáwm.

Sawihona hi Fede­ration of Mizoram Go­vernment School Teachers (FMGST) buatsaih a ni a; School Education secretariat leh directorate-a officer te, MBSE, SCERT, Samagra Shiksha leh DIET-a officer-te leh zirtirtu pawl hrang hranga hruai­tute an tel a ni.