ZPM ṭhalaite'n CAB sawihonaa MNF leh MPCC kal lo an dem

ZPM party ṭhalaite chuan, November 29, 2019-a New Delhi-a Union Home minister Amit Shah hoa Citizenship Amendment Bill (CAB) sawihonaa tel turin MNF president leh chief minister Zoramthanga, Home minister Lalchamliana leh MPCC treasurer Zo­dintluanga te chu hming hmerha sàwm an ni chungin an kal lo tih an tarlang.

ZPM ṭhalai chuan, CAB chungchang sawiho tura Home minister Amit Shah-a'n hming hmerha a sâwmte aṭangin tlawmngai pawl hruaitute an kal ṭha hle tih sawiin, "Political party aṭangin Mizoram BJP president JV Hluna leh ZPM secretary general K Sapdanga te chauh an kal hi ngun taka ngaihtuahin, MNF leh Congress party-te hian Mizoram leh hnam leh kan sakhua an hmangaih tak tak lohzia a tilang chiang hle a ni," an ti.

CAB chu hnam thil lian tak a nih avangin Central hotute paw'n an ngai pawimawh a, hming hmerhin meeting kohna an siam nia a lan thu sawiin ZPM ṭhalai chuan, "Chutih laia chhuanlam dawráwm tê tê leh a hun a teptèr tih vanga an kal lo hi a pawi hle a ni," a ti a; hun teptèr tawh taka an aia kal tur an tírte phei chu a sáwmtu Central hotute leh Mizo mipui zah lohnaa an ngaih thu an sawi bawk.