Rs 500 note thar a lo thleng Pawisa mamawh zualpui a phuhruk theih beisei

Rs. 500 leh Rs. 1,000 note hlui tihthih a nih hnuah Rs. 500 note thar chu Pathianni khan Mizoramah a rawn thleng a, nimin khan bank hrang hrangah sem darh a ni a; harsatna zualpui chu tiziaawm thei tura beisei a ni.

SBI Main office-a assistant general manager (AGM) Pradip Kumar Sen hnen aṭanga Vanglaini thu dawn danin, Rs. 500 note thar hi November 27, 2017 khan a lo thleng a, mahse, an chawlh ni a nih avangin nimin khan bank hrang hrangah sem darh thei chauh. Pawisa hi bank len dan azirin cheng nuai 20 aṭanga 40 inkara vela sem a ni.

Pradip Kumar Sen chuan, Rs. 500 note thar rual hian Rs. 100 note ṭhahnem tak a rawn thleng belh thu sawiin, "Pawisa rawn thleng zat chu security thil vangin sawi chi ni lo mah se, kan mamawh khawp chu a rawn thleng. Buaina pawhin ziaawm lam a pan phah ngei ang," a ti.

Pathiannia ATM booth eng emaw zat khâr a nih chungchanga zawhna chhangin SBI AGM chuan, "Kan pawisa dah mipuiin an la chhuak chak lutuk a, Inrinni leh Pathianni hi chawlh a ni si a, pawisa kan dah loh avangin khâr a ni," a ti a; ATM-ah hian nimin khan pawisa dahin, hawn leh nghal a nih tur thu a sawi.

Inrinni leh Pathiannia bank-te an chawlh avang hian nimin lamah bank dawr tum leh ATM-a pawisa lak tum ni dang aiin an tam leh deuh a ni.

Sorkar laipui thupek angin, Rs. 500 leh Rs. 1,000 note hluite bank-a thleng theih hun chu November 24, 2016 zanlai aṭangin a tawp tawh a, bank account-ah erawh chuan pawisa note hlui dah luh zel theih a ni.

Rs. 1,000 note hlui bik chu November 25 aṭang khan khawi hmunah mah hman theih tawh loh tura tih a ni a; Rs. 500 note hlui erawh chu sorkar sikul, sorkar enkawl college, mobile phone top-up thun nan, cooperative store leh electric bill leh tui bill pek nante December 15, 2016 thleng hman chhunzawm theih tura tih a ni. Note hlui pahnihte hi December 30 thleng bank account-ah dah luh theih tura tih a ni bawk.