MNF-in Lunglei DC circular copy an hâl

29th November, 2016

MNF ṭhalaite chuan nimin chhun khan Mizo Hnam Rûn kawtah Lunglei DC Lalzarmawii'n November 25, 2016-a circular a chhuah copy an hâl. Hetih lai hian, Lunglei DC chuan circularthar chhuahin, November 25-a circular a lo chhuah tawh chu sût (cancel) a nih thu a tarlang.

Lunglei DC circular hâlnaah hian MNYF president K Vanlalvena chuan, "Kan sorkar hrawn mek hi sipai sorkar ang maia mipuite zalenna rapbet zawnga thupek déngkháwng tak tak chhuah chíng sorkar a ni," a ti.

K Vanlalvena chuan, Lunglei DC-in Lunglei district chhunga hman tur circular a chhuah chu sorkar hnathawk leh an chhung-khatte vaubeh tumna thu thin-
ṭháwng tak a nih thu sawiin, "He order hi Fundamental Rights dodalna leh democratic principle palzûtna lian tak a nih avangin a order copy hi kan hâl a ni,” a ti a; sorkar hnathawk chhungkhatte'n an democratic right hmang thei lo tura khapna thupek chhuah a ni chu ṭha lo an tih thu a sawi.

All India Service (Conduct Rules) 1968, No. 5(2)-ah chuan sorkar hnathawk chhungkhatte sorkar tihchhiat tumna lam hawi reng rengah an inhnamhnawih loh tur thu chu a chuang ngei tih sawiin, K Vanlalvena chuan, "Amaherawhchu, NGO dangte leh zirlaite'n hma an lakna zawng zawng hi sorkar tihchhiat tumna ni loin, thil ṭha ti tura sorkar an auh ei tumna hmanrua vek zawk a ni," a ti.

Hetih lai hian, Lunglei DC Lalzarmawii chuan circular chhuah nawn lehin, November 25-a circular a lo chhuah tawh chu cancel a nih thu a tarlang. Circular chhuah nawn leh hi November 26, 2016-a chhuah anga ziah a ni.

Lunglei DC circular-ah chuan, "He Office order no. 15016/1/2014/DLC(C) dt. 25th. Nov, 2016-ah sorkar hnathawkte'n an hriat tur Central Civil Service (Conduct) Rules, 1964-in a tarlan bak thu belh ṭhenkhat leh tuh ngaih sual theihte a lo awm avangin cencel a ni," tia ziah a ni.

Lunglei DC-in circular a cancel chung-changah hian MNYF president K Vanlalvena chuan, "Circular hi nimin zinga chhuah a ni a, November 26, 2016, Inrinnia chhuah angin an back date a ni," a ti.

MNYF President chuan, Lunglei DC circular chu MNF ṭhalaite'n a copy an hâl dawn tih an hriat avangin sorkar thuneitute'n nimin zing khan a sûtna circular an chhuahtir niin a sawi a, "Hâl dawn lo ila a sûtna order hi an chhuah kher lo ang," a ti a; sorkar thil tih kual vel dan chu ṭha lo a tih thu Vanglaini palai a hrilh.