Tlabung bula BSF Outpost thar hawng

Cheng nuai 650 chuang sênna, Tlabung bul Bindasora khaw daifêma Border Security Force (BSF) Outpost chu nimin khan Mizoram leh Cachar Frontier bialtu BSF inspector general (IG) NS Jamwal-a'n a hawng.

BSF IG chuan, sipaite chu an mawhphurhna pawi-mawhzia hre reng tur leh ramri leh a chhehvel mipuite himna dah pawimawh hmasa ber fo turin a chah a, "Engtik lai pawhin ram tana thawk kan ni tih kan hriat reng fo a ṭul," a ti. BSF-te chu ramri bul hnaia cheng mipuite'n thlamuanpui se a duh tih sawiin, ramri venhim bakah vantlang tana thil ṭha tih kawngah hma hruaitu nih tum fo turin sipaite a chah a ni.

Tlabunga press-mite zawhna chhangin NS Jamwal chuan, Tlabung leh a chhehvel ramria duty chu sipaite tan chona nasa tak a tling tih sawiin, inbiakpawhna leh inkalpawhna a ṭhat loh vanga harsatna an tawh ṭhin thu a sawi. Tlabung chu ramri hrûla awm ni mah se, ram chhung hmun dangte nen ang khata ngaih pawimawh leh tihhmasawn a ṭul thu te, Tlabung leh a chhehvela sikserh a hluar vanga harsatna an tawh phah fo thute a sawi bawk.

Ministry of Home Affairs sum cheng nuai 650 chuang senna Bindasora-a BSF BOP hi sakhaw pali - Kristian, Muslim, Sikh leh Hindu-te lehkhabu thiang-hlim chhiar zawh hnuah hawn a ni a; sipaite mamawh chi hrang hrang awmna tura thuam changtlun niin, ni zung chakna hmanga kawlphetha siam chhuahna bakah, tui thianghlim dahkhâwlna siam a ni.

Mizoram leh Cachar bialtu IG hi DIG pahnih - Akileshwar Singh leh Asthana bakah 99 battalion commandant SK Sinha leh 166 battalion Commandant B Sreedhar-ten an ṭawiawm.