Sorkar hnathawkte tan training buatsaih

Sorkar laipui hnuaia Department of Personnel & Training ruahmanna hnuaia India ram puma neih mek, 'Induction Training Programme for Cutting Edge Covernment Functionaries' chu nimin khan Serchhip SP conference hall-ah Administrative Training Institute (ATI) bultumin Serchhipah ṭan a ni.

Training hawnna inkhawm hmanpuitu Serchhip DC Dr Lalrozama chuan, "ATI zawkin training min pe tura min rawn pan hi a lawmawm em em a, kan vannei hle. Chuvang chuan, training tura thlante pawhin ṭhahnemngai takin, course co-ordinator-te'n tih tur an tih ang zawng zawngte ti a, hun vawn dik tur a ni," a ti a; sorkara head of office-te chu an hnuaia thawk, training mekte lo pawt buai rih lo turin a hrilh.

ATI director SB Shasank chuan, "Sorkar laipui chuan India rama sorkar hnathawk group hrang hrang-a mite'n hlâwk zawka mipui rawng an bawl theihna tura an mamawh
hrang hrangte a zir chian hnuah, state tina ATI-te kaltlangin training hi kalpui a ni a, Mizoramah pawh ATI-in hei hi kalpuiin, vawiin hi Serchhipa a ṭum hnihna a ni," a ti.

Sorkar hnathawkte'n training chu an hlâwkpui ngei dawn tih sawiin ATI Director chuan, "Inrintawkna te, mipui dawr dan ṭha zawk te, dan pawimawh, a bikin RTI Act chungchang te, department dangte nena indawr tawn dan te, buaina sutkian dan (stress management) thlengin mumal leh kalhmang nei takin zir a ni ang," a ti a; sorkar hnathawkte chu vantlang tana mi ṭangkai ni tura nun dan pawh zirtir an nih tur thu a sawi.

SB Shasank chuan training tura kalkhawmte chu ATI zirlai naupang an nih inhre tur leh thuawih leh training hunte vawng dik thlap turin a ngen a ni.

Training-ah hian ni 12 chhung a awh dawn a, department hrang hranga assistant, UDC leh LDC 27 an tel a ni.