MPC-in kawlphetha intodelh phawt ṭul an ti

MPC party chuan thuchhuah siamin, November 24-25, 2016 chhunga Mizoram High Level Team, Finance minister Lalsawta hoa Gujarat tlawha kalte'n contract farming, co-operative movement leh enterpreneurship development kalpui dan an zirte Mizorama ṭangkai taka hman ve an duhnate tipuitling turin kawlphethaa intodelh phawt ngaia an hriat thu an tarlang.

MPC chuan, "Mi ramte anga power-a kan intodelh ve loh avangin Mizoram tan chuan hmuhnawm satliah a ni leh ringawt mai ṭhin hi pawi kan ti. Electricity hnianghnâra kan ramin a neihna tura PC hmalak tawhna kha Congress leh MNF party-te'n chhunzawm ngat se chuan tunah hian a hlawhtlinna hmêl hmuin kawlphetha chakna hmanga kan ram thil tih theihna ramdangte'n an rawn zir tawh zawk ngei ang," an ti.

MPC chuan, Tripura-a Mizoram Bru raltlante hruai kîr leh tura Mizoram sorkarin a buaipuina kawngah, Mizoram leh Mizo mipuite hmakhua ngai chung zela ruahmanna ṭha tak hmanga hma la zel turin Mizoram sorkar an ngen a; Krismas leh kumthar lo thleng turah mipuiin hlim leh thlamuang taka hun an hman theih nan dan leh thupek ṭha taka kengkawh turin Mizoram sorkar an ngen bawk.