Lammualah SARAS Fair leh SHG Mela

Urban Development & Poverty Alleviation department leh Mizoram Rural Livelihood Mission (MzSRLM) chuan nimin khan Lammualah '11th Sale of Articles of Rural Artisans Society Fair (SARAS Fair)' leh 'Self Help Group (SHG) Mela 2025' an buatsaih ṭan a, UDPA minister K Sapdanga'n a hawng.

SARAS Fair leh SHG Mela hi November 1, 2025 thleng neih tur a ni a, stall 102 leh food stall pariat bakah, naupang intihhlimna eng emaw zat siam niin, Mizoram district tina SHG eng emaw zatin an thar chhuah leh kutchhuakte an zuar a ni.

K Sapdanga chuan, SHG chu eizawnna ngêlnghet neihna atana mimal anga hmalakna kawnga harsatna awm ṭhin sukiang tura thiamna leh theihna hrang hrang nei intelkhawm pawl a nih thu a sawi a, "Mizoram khaw hrang hrang aṭanga SHG member-te kutchhuak hralh tur leh pho chhuahna hun ṭha buatsaih a ni hi a lawmawm tak zet," a ti.

National Urban Livelihood Mission leh National Rural Livelihood Mission thil tum pawimawh tak chu khawpui leh thingtlang nuho tana eizawnna ngêlnghet siamsak a nih thu sawiin K Sapdanga chuan, "An khawsak dinhmun chawikansak kawngah SARAS Fair leh SHG Mela hi hmanraw ṭangkai tak a nih ka beisei," a ti a; Mela chu SHG-te'n hlâwkna thar hmuh phahna a nih ngei a beisei thu a sawi.

Khualzahawm Prof. Lalnilawma, Rural Development & Administration (RDA) minister-in 'Selhel' brand, arsa zawrhna ‘Chhimphei Online Marketing Portal’ leh 'Broiler Ar Vulh Dan’ tih lehkhabu a tlangzarh.

Prof. Lalnilawma chuan, Selhel chu Mizorama SHG member-te thar chhuah leh siam chhuah hrang hrang chhinchhiahna bik atana buatsaih a nih thu a sawi a, "Mizoram SHG-te hi a ṭha zawng chauha hriat reng an nih theih nan Selhel brand hnuaia kan thlai, thei thar chhuahte leh thil chi hrang hrang kan siamte chu a ṭha ber ber chauh a nih theih nan thlit fimna leh endikna ṭha taka kalpui a pawimawh," a ti.

RDA Minister chuan, "Arsa thianghlima kan intodelhna tur leh awlsam zawk leh sâwt zawka sumdawnna kalpuina turin Chhim-phei Online Marketing Portal buatsaih a ni," a ti a; online-in arsa chah mai theih a ni a, 'home delivery' tih a nih thu a sawi.

SELF HELP GROUP LEH SARAS FAIR
☑ Mizorama district 11-a RD block 28 chhunga khaw 721-ah SHG 11,257 din a ni tawh.
☑ SHG 11,257-ah member 81,030 an awm mek.
☑ SARAS Fair 2024-ah SHG member-te'n cheng nuai 50 chuang hû an hralh.
☑ NULM hnuaiah SHG 1,532 an awm mek a, SHG Mela buatsaih hnuhnung berah cheng nuai 14 hû hralh a ni.
☑ MzSRLM hmalaknain Regional SARAS Fair vawi 10 neih a ni tawh.
☑ Kum 2024 khan Champhaiah Hnahsin Kût nen SARAS Fair buatsaih kawp a ni a, SHG-te'n Rs 57,85,197 man an hralh.
☑ December 2024 khan Aizawlah SARAS Fair buatsaih a ni a, RD block 28 aṭangin SHG 100 chuang telin, Rs 40,27,579 hu hralh a ni.