KHAWTHLIR

Upate pualin intihhlimna buatsaih

Directorate of Social Welfare, Mizoram Upa Pawl leh Directorate of Ayush te chuan nimin khan Central YMA Hall-ah 'Upate pual intihhlimna leh inzirtirna' an buatsaih a, Social Welfare minister Lalrinpuii'n a hmanpui. He hunah hian Aizawla MUP branch 18 leh MUP Lunglei General Headquarters hnuaia branch pali hnenah an inkawm hlimna hmun tih phuisui nan Rs 50,000 ṭheuh hlan a ni.

Zokhawthar tlawh

National Commission for Women member Delina Khangdup chuan October 27, Thawhṭanni khan Zokhawthar a tlawh. Delina Khangdup hian Zokhawthara police-te leh Assam Rifles sipaite kâwmin, hmeichhiate himna leh chawikanna kawnga thawhho dan tur a sawipui a; mihring hmanga sumdawnna (human trafficking) donaa hma lakpui turin a sawm a ni.

Ruihhlo thubuai ziah luh belh lo

Serchhip District NCORD chu an chairman Paul L Khuma, bawrhsap hoin nimin khan an ṭhukhawm a; ṭhukhawm hmasa leh tun ṭhutkhawm inkarah ruihhlo kaihhnawih thubuai ziah luh thar a awm loh thu tarlan a ni. Sorkar thuneitute, dan leh thupek kengkawhtute leh tlawmngai pawlte ṭanrualna avangin ruihhlo a tlem chho zel nia an hriat thu sawi a ni bawk.

Ruihhlo phurh khap

Lawngtlai District Transport Officer chuan thuchhuah siamin, Lawngtlai district huam chhunga lirthei register reng rengah ruihhlo phurh phal a nih loh thu a tarlang a, "Ruihhlo phur lui an awm a nih chuan an lirthei registration/permit cancel bakah, a phurtu driving licence cancel sak a ni ang," a ti.

MGNREGS thlirho

Khawzawl district bawrhsap K Vanlalṭhiana hoin nimin khan July-September, 2025 chhunga ni 100 inhlawhna (MGNREGS) kalpui dan thlirho a ni. Bawrhsap chuan, rilru nei taka ni 100 inhlawhna kalpui zel turin department leh VC tinte a sawm.