Oct. 2024 - Sept. 2025 chhungin ei tlak loh damdawi 23 hmu chhuak

Health department hnuaia Food & Drugs Administration (FDA) chuan thuchhuah siamin, October 2024 - September 2025 chhungin damdawi 800 an zirchiantirnaah ei atana tlak loh 23 hmuh chhuah a nih thu an tarlang a; damdawi ei turah fimkhur turin hriselna lama thawkte leh mipui an chah.

FDA chuan, Mizoramah damdawi ṭhat dan (quality) endikna a la awm loh avangin Regional Drug Testing Laboratory (RDTL), Guwahati-ah damdawi endik turte thawn ṭhin a nih thu an tarlang a, "Sorkarin supplier-te aṭanga a lei damdawite leh mimal damdawi zawrhna (pharmacy)-a damdawi zawrh laite lain, laboratory-ah kan thawn ṭhin," an ti.

FDA tarlan danin, IPA-MHSSP hnuaiah October 2024 - September 2025 chhung khan FDA chuan RDTL-ah endik turin damdawi 800 an thawn a; damdawi lem (spurious) hmuh ni lo mah se, a nih dan tur ang ni pha lo leh ei atana tlak loh damdawi 23 hmuh chhuah a ni.

Endik tura damdawi an lak zinga a tam ber chu sorkar supply damdawi - hospital, CHC leh PHC hrang hranga semte a ni a, IPA sum hmanga local purchase an neihte leh mimal damdawi dawra zawrhte pawh endik ṭhin a ni. Kum 2022-23 chhung khan Mizorama damdawi rawn lut sample 106 endik a ni a; kum 2023-24 chhungin 121 leh October 2024 - September 2025 chhungin damdawi 800 endik a ni.

Pradhan Mantri Bhartiya Janaushadhi Kendra-a zawrh generic drug-te pawh endik ṭhin a ni a; October 2024 leh September 2025 inkara damdawi man tlawm 100 endik zingah quality ṭha lo pahnih hmuh chhuah a ni. Damdawi pangngai 700 endik zinga 21 chu quality ṭha lo a ni tih hmuh chhuah a ni bawk.

FDA chuan, India ramah damdawi siamtu company sing chuang an awm thu tarlangin, "Damdawite hi a siamna hmanrua (raw-material) zawng zawng test hmasain siam a ni ṭhin a, siam mek leh siam zawh tawh hnuah pawh hralh chhuah hmain test leh tur a ni a, test paltlang chauh hralh chhuah tur a ni. Hengte hi company-te'n an zâwm thlap em tih erawh ngaihtuah tham a ni," an ti.

India ramah damdawi lem hmuh chhuah a awm zauh zauh tih sawiin FDA chuan, "Chu'ngte chu damdawi siam phalna licence pawh nei lo, a rûka siamtute thiltih a ni ṭhin," an ti a; Mizorama damdawi rawn lutte chu damdawi dik leh standard drug an nih leh nih loh hriat nan a tam thei ang ber endik a ṭul thu an tarlang.