KHAWTHLIR

KṬP-in thisen pe

KṬP, Muallungthu Pastor Bial chuan October 28, Thawhlehni khan Zoram Medical College & Hospital-ah thisen pek huaihawtin, thisen unit 38 an pe a, petute mipa 33 leh hmeichhia panga an ni.

Lirthei tlân dan

Aizawl Traffic SP Ruatsanga Ralte chuan thuchhuah siamin, Temple-Vaivakawn inkarah lirthei tlan dan a felfai zawk theihna tur leh mipui himna atan MMV/HMV-te tana tlan theih hun tihdanglam a nih thu a tarlang. Vaivakawn aṭangin Temple Square lam panin MMV/HMV-te chu zan dar 7-9 inkarah chauh tlan chhoh phal a ni a; Temple Square aṭangin Vaivakawn lamah zan dar 9:30 aṭanga zing dar 6:30 inkarah chauh tlan phal a ni.

Krismas bazar

Lunglei Municipal Council chief executive officer Malsawmtluanga chuan thuchhuah siamin, kumina hunpui thleng tur pualin LMC-in Lunglawn Mualah Krismas Bazar a siam dawn thu a tarlang. LMC CEO tarlan danin, Krismas Bazar siam turah hian dawr (stall), food stall leh play park siam tum a ni a, stall siam duhte tan LMC office-ah dilna form siam sa hmangin dilna thehluh theih a ni. Lunglawn Mual tih loh hmun dangah stall siam phal a ni dawn lo.

Kawng khâr dawn

PHE department chuan Vaivakawn Zohnuaia Greater Aizawl Water Supply Scheme Phase-III pipe line chhia an siam chu an enchhin (hydraulic testing of pumping) dawn a; hei vang hian Traffic SP Ruatsanga Ralte chuan Vaivakawn Zohnuai leh Ropaiabawk inkar kawng chu nimin aṭanga November 5, 2025 thleng lirthei tlân theih loha khâr a nih dawn thu a tarlang.

LMC property tax

Lunglei Municipal Council secretary Zoramdini chuan, Lunglei khawpuia property tax 2024-25 khawn mek chu November 15, 2025-ah khâr a ni dawn thu leh, hun tiam chhunga pe lote chu an pek tur zat aṭangin 10% an chàwi belh a ngaih dawn thu a tarlang.