Hnam ṭobul zawn chhuah dan tur sawiho

Chief minister Lalduhoma kaihhruai 'Committee on Hnam ṭobul zawn chhuah' chu October 28, Thawhlehni khan CMO conference hall-ah an ṭhukhawm. CM chuan, Mizo hnam ṭobul chhui chhuak turin a ṭul a nih chuan scientific taka hmalak thlengin an inhawn thu a sawi.

Committee on Hnam Ṭobul Zawn Chhuah hi Art & Culture department kaltlanga din a ni a, Mizo hnam ṭobul chhui chhuak tura an hnathawhna tur sum mamawhte chu sorkar laipuia Ministry of Tribal Affairs hnuaia Support to Tribal Research Institute aṭanga hmuh theih beisei a nih thu sorkar thuchhuahin a tarlang.

CM Lalduhoma chuan, sorkarin a pawmpui tlâk hnam ṭobul leh chanchin kimchang zawk chhui ṭul an tih thu a sawi a, "Mizo hnam pêng hrang hrangte huapzo, tunlai thiamna thar ber berte hmanga ril zawka chhui ṭul kan ti a, a ṭul a nih chuan hnam dang mithiam rawih huamin, scientific taka chhui a ṭulna kawngah pawh inhawng takin hma kan la dawn nia," a ti.

Art & Culture minister C Lalsawivunga pawhin thu sawiin, "He hmalakna hi mithiamte rinchhan hmalakna a ni," a ti a, mithiam, hnam chungchanga tui, inpe taka hna thawk thei tur an mamawh thu a sawi.

Ṭhutkhawmah hian hun kal tawh (history) chhui dan pêng hrang hrang hmanga hmalak a nih theih nan a taka hnathawktu tur mithiam fawm khawm phawt ni se an ti a; Art & Culture Minister kaihhruaiin Art & Culture department-in tam lam bituk nei loin hna thawk thei tur mithiam lo zawng khawm hmasa se, an inpeih hunah ṭhutkhawm leh ni se, an ti bawk.