Zirna hmuna vaihlo khap chungchang zirho

National Population Education Project, NCERT hnuaia Population Education Cell, Mizoram SCERT leh National Tobacco Control Programme (NTCP) chuan October 28, Thawhlehni khan SCERT Auditorium-ah 'Sensitization Workshop for District Level Officials for Effective Implementation of School Rally Challenge for Tobacco Awareness and Tobacco Free Educational Institutions (ToFEI) Guidelines' an buatsaih.

Zirna hmuna vaihlo khap chungchang zirhona hi Ministry of Education bultum niin, ni hnih awh tur a ni a; district tina district education officer te, DIET principal te, DEO pisaa Tobacco Free Educational Institution (ToFEI) nihna chelhtu te, state nodal officer leh district nodal officer te, School Education leh SCERT-a Tobacco Control Team member-te an tel.

NTPC state nodal officer Dr Zoramthangi Renthlei chuan, vaihlo zûk leh hmuam chu ruihhlo dang tihna kailâwn a nih avangin naupang naupang leh ṭhalai, zuk leh hmuam la ti ve lote ruihhlo laka venhim a pawimawh thu a sawi a, "Ruihhlo dang ang bawkin zûk leh hmuam ngawlveina laka himna ṭha ber chu tih chhin loh a ni," a ti.

SCERT joint director Dr Lalduhawmi Thomte pawhin thu sawiin, vaihlo khapna dan - Cigarettes and Other Tobacco Products Act, 2003 (COTPA)-in a khapte leh thil tumte a sawifiah a; COTPA-in a khapte chu puipunna hmuna meizûk te, vaihlo hmanga siam ruihhlo fakmawi leh naupangte hnena hralh chhuah te, tobacco product reng renga health warning dah zel tur a nihthu te a sawi.