Doctor leh nurse zingah ruih theih thilin a tihbuai an awm ṭhin, a pawi hle - Health Minister
Health & Family Welfare minister Lalrinpuii chuan nimin khan Dawrpui Multipurpose Centre-ah Blessino Nursing School Capping, Lamp Lighting vawi sarihna leh Graduation Day vawi lina a hmanpui a, Blessino Pharmacy Institute a hawng nghal. Minister chuan, doctor leh nurse zingah hna thawk mumal thei lo khawpa ruih theih thilin a tihbuai an awm ṭhin chu pawi a tih thu a sawi.
Lalrinpuii chuan, hriselna lama thawkte chu mipui tana thawk an nih avangin mi dang aia an invawn a ngaih thu a sawi a, "Doctor zingah ruih theih thilin a tihbuai, hna pawh thawk mumal thei lo khawp kan kawl nual mai a, a zahthlakin a mawi lo hle. Ruih theih thilin a tihbuai hi nurse-te zingah pawh an awm a, a pawi tak zet a ni," a ti a; zirlaite chu fimkhur taka awm tur leh ruih theih thil laka fihlim turin a chah.
Health Minister hian Blessino Nursing School-a nurse leh pharmacy zirtirtute chu an zirlaite tana nun entawn tlak nei tur leh, nurse leh pharmacist chher chhuaktu ni ringawt lo a, khawtlang leh chhungkaw tana innghahna tlak, ringtu ṭha chher chhuak turin a fuih. Tunlai thiamna mila inzir belh zel tur leh zirlaibu piah lamah chona hmachhawn zel turin zirlaite leh zirtirtute a chah bawk.
Pharmacist-te tel loin damdawi dawr hawn phal a nih loh thu sawiin Minister chuan, "Damdawi khuahkhirhna dan The Drug and Cosmetic Act, 1940 leh The Drug and Cosmetic Rules, 1945 kan hmang mek a, dan hnuaiah damdawi dawr nei tur chuan pharmacist a nei ngei tur a ni a, pharmacist-te'n damdawi dawrte an ṭhut chilh ngei a ngai," a ti.
Lalrinpuii chuan, pharmacist-te an pawimawh em em laiin, Mizoramah chuan an pawimawhna angin hman an la ni tawk lo tih a sawi a, "Tunah hian sorkar chuan damdawi-in tinah doctor of pharmacy (Pharm.D) an awm ve theih nana hmalak dan tur a ngaihtuah mek," a ti a; thingtlang lama damdawi-inah pharmacist post ruak a tam thu a sawi.
Health Minister chuan, Mizoram Universal Healthcare Scheme chu mipui tana duan a nih thu sawiin, mipuiin an chhawr ṭangkai lehzual theih nan damdawi-in hrang hrang tihchangtlun chhoh zel a nih thu a sawi bawk.
Inkhawmah hian Civil Hospital, Aizawl nuring superintendent H Vanlalhluni kaihhruaiin zirlai lut tharte'n nurse lukhum an khum a, khawnvar chhiin, nurse thutiam sawi rual a ni a; zirlai ti ṭhate hnenah chawimawina hlan a ni.
Blessino Nursing School hi kum 2019-ah din niin, batch tinah zirlai 30 zel lak a ni a; kuminah zirlai graduate thar 26 awmin, zirlai 150-in an zir chhuak tawh. Blessino Pharmacy Institute-ah zirlai 60 an awm mek bawk.