KHAWTHLIR

TA atan inbuatsihna

Mizorama Territorial Army (TA) lakna hmasa ber buatsaih tur pualin Assam Rifles chuan October 28, 2025 khan Siahaah TA pre-recruitment rally an huaihawt a, Siaha leh a chhehvela ṭhalai 30 vel an tel. Rally-ah hian AR-te chuan TA general duty dil thei chin te, application form dahkhah dan te, lehkha pawimawh neih ngai te, TA lakna hmachhawn dan tur thil chi hrang hrang an zirtir a ni.

Coop. society zirho

Planning & Program Implementation department hnuaia Mizoram Startup Mission bultumin nimin khan Chawngtlaiah 'Training on Society Norms and Operational Guidelines' buatsaih a ni a, Champhai district-a cooperative hotute'n an hmanpui. Cooperative society-a inziah luh ṭhatna leh a ṭangkainate zirho a nih bakah, zawhna leh chhanna hun hman a ni.

Kawng khâr dawn

Chawnpui Venga Kângṭhelhkawn leh Hmingmawii Filling Station, Zonuam inkar kawng chu thawm ṭhat a ni dawn a; hei vang hian vawiin chawhma dar 10 aṭanga tlai dar 4 inkar leh, naktuk zing dar 9 aṭanga tlai dar 5 inkarah kawng hi khâr a nih dawn tih Traffic SP Ruatsanga Ralte-in a tarlang.

Heroin man

Lunglei Police-te leh Assam Rifles sipai ṭang dun chuan nimin khan Children Park, Lunglei Chanmari-ah Lalhmunsiami (43) d/o Dohranga, Lungrang, Lalruatdiki (48) w/o Muanpuia, Siaha Tlangkawn leh Lalmuansanga (25) s/o Lalthankima, Lunglei Bazar Veng nia inchhálte hnen aṭangin heroin gram 13.73 an man a; Lunglei Police Station-ah thubuai ziah luh a ni.

Ekta Diwas

Vawiin October 31 hi Rashtriya Ekta Diwas (National Unity Day) a ni a, Secretariat leh sorkar pisa hrang hrangah sorkar hnathawkte'n India ram inpumkhatna atana ṭan la tura intiamna thu an sawi rual dawn. Rashtriya Ekta Diwas hi kum 2014 aṭang khan Sardar Vallabhbhai Patel pian champha, October 31-ah kum tin hman ṭhin a ni.

CM-in NEC tlawh

Chief minister Lal-duhoma chuan nimin khan Shillong-a North Eastern Council (NEC) pisaah NEC Secretariat-a sector hrang hrang hotute a kâwm a, NEC kaltlanga Mizoram sorkar hmalaknate leh NEC-in harsatna a neihte a sawipui. NEC-ah hian hmarchhak state leh Sikkim state CM-te council member an ni a; council member-in anmahni hmun ngeia meeting a neih pui hi a vawikhatna a nih avangin NEC member-te leh official-ten CM hi lawmthu an lo hrilh a ni. CM Lalduhoma hi OSD to CM R Lalro-dingi'n a ṭawiawm a ni.