Minister-in thlai sawngbawlna a hawng

MIFCO Complex, Chhingchhipa Ropuiliani Women Farmer Producer Company Ltd (RWPCL)-in sawhthing, aieng leh hmarchha an sawngbawlna tur, Primary Processing Plant an bun thar chu nimin khan Rural Development & Administration (RDA) minister Prof. Lalnilawma’n a hawng.

Primary Processing Plant-ah hian thlai tihfai leh tihro bakah, hralh chhuah tura her sawm leh chan sawm theih a ni dawn a; elevator conveyor (thlai phur chhotu), drum washer (lei tifaitu), bubble washer conveyor (silfaitu), air dryer conveyor (chhem rona), slicer machine (chan sawmna) leh heat pump dryer (tirotu)-te a awm tel a ni.

Prof. Lalnilawma chuan, kut hnathawktute'n an thawh rah an hmuh a pawimawh ber tih sawiin, "Mi harsa zawkte'n leirem an rah theih nan i ṭang tlang zel ang u. MIFCO-in Chhingchhipa an hmunah Ropuiliani WFCL-te thlai thar sawngbawlna tur khawl bunna tur hmun an pe hi a lawmawm a, SHG nuho leh kut hnathawktute tan a ṭangkai hle dawn a ni," a ti.

Mizorama thlai tharte state páwna hralh chhuak turin quality ṭha a pawimawh tih sawiin Lalnilawma chuan, "Tuna khawl thar bun tak hian thlai thar, a bik takin sawhthing, hmarcha leh aieng hralh kawngah a hlutna a tisang hle dawn a ni," a ti a; rêl hmangin tláwm zawkin thlai thawn chhuah theih a nih tawh thu a sawi.

Ropuiliani WFPCL Primary Processing Plant hawnnaah hian Serchhip bawrhsap Paul L Khuma, RDA director K Lalrohlua, SIRDPR director R Lalremsanga leh mi pawimawh dangte an tel.