State 2 leh UT 4 din ni lawm a ni

Governor Gen. Dr Vijay Kumar Singh hoin nimin khan Raj Bhavan-ah Ek Bharat Shreshtha Bharat hmalakna hnuaiah union territory pali - Jammu & Kashmir, Ladakh, Andaman & Nicobar Islands, Chandigarh leh state pahnih - Andra Pradesh leh Chhattisgarh te foundation day lawm a ni.

Foundation day lawmnaah hian state pahnih leh UT palite chanchin tlangpui tarlan niin, Mizoram Christian College zirlaite'n Mizo hnam lâm an entir a; state leh UT din ni lawmsak mi leh sa, Mizorama awmte an tel.

Governor chuan, India ram inpumkhatna atana pawimawh tak, 'Ek Bharat Shreshtha Bharat' hmangin India ram khawi hmunah pawh hnam ziarâng leh nunphungte inpawh tlang taka pholanna 'Mini India' siam ṭhin a nih thu a sawi.

Larsap chuan, "India ram anga hnam ziarâng leh nunphung danglam nasa ram a awm lo a, India ram intodelh leh hmasawn 'Vikshit Bharat' siam turin lungrual taka kan thawhho tlan a ṭul," a ti a; state dangte hnam ziarâng, nunphung, ṭawng leh inkaihhruainate hriat chian lehzual tum turin kal khawmte a chah.

Sorkar thuchhuah tarlan danin, November 1, 1956 khan Andra Pradesh siam niin, ṭawng behchhana state siam hmasak ber a ni a, hemi ní vek hian Andaman & Nicobar Islands chu UT-ah puan a ni.

November 1, 1966 khan Chandigarh chu UT-ah puan a ni a, Chhatisgarh chu November 1, 2000 khan state-ah hlankai a ni.

Jammu & Kashmir chu hun rei tak state a nih hnuah October 31, 2019 khan ṭhendarh a ni a, Jammu & Kashmir leh Ladakh UT-ah puan a ni.