Vandula lungdawh & Ropuiliani lungphun Minister Chhanzova'n Dènlungah a hawng

Minister of state B Lalchhanzova chuan nimin khan Dènlung khuaah Mizo lal hmingthang Vandula lungdawh leh a nupui lalnu Ropuiliani puala lungphun a hawng. Minister chuan, hnam dang laka tlâwm lo turin zirna leh thiamna lamah intah hriam a ṭul thu a sawi.

Vandula lungdawh leh Ropuiliani lungphun hi Denlung Branch YMA leh Denlung khawtlang mipui ṭangrualin an sak a ni a; Ropuiliani tute zinga mi Lalṭhuama Sailo chuan Rs 5,00,000 a thawh. Lalnu Ropuiliani lungphun hi a san zawng ft. 5'4" leh a hlai zawng ft. 2'9" a ni a; Vandula lungphun chu a san zawng ft 5'3" leh a hlai zawng ft 3 a ni.

Minister B Lalchhanzova chuan, Mizo hnam tana lalnu Ropuiliani inpekna chu ṭawngkaa sawifiah theih a nih loh thu a sawi a, "Lalnu Ropuiliani aṭanga entawn tur pawimawh tak chu a tlàwm ve lohna nun kha a ni. Mizo hnam hi hnam dang laka kan tlawm ve loh nan chempui leh tharum a tâwk tawh lo a, zirna leh thiamna lama intah hriam hi hnam humhimna tura pawimawh berte zinga mi a ni," a ti.

Ropuiliani puala lungphun chuan mi tin thinlungah hnam tana inpekna tuh thar leh se a duh thu sawiin B Lalchhanzova chuan, "Rinawmna, huaisenna leh mahni hnam tana din ngheh tlatna rilru kan put ṭheuh a ṭul a, chu chu mi dang tih tura dah loin, mahni mawhphurhna ṭheuhah i dah ang u," a ti a; rinawm taka mahni tih tur ṭheuh hlen chhuak zel turin kal khawmte a chah.

Khualzahawm Jeje Lalpekhlua, bialtu MLA chuan kal khawmte chu dikna chawi nung a, sum dik lo laka inthiar fihlim chu khuareiah a tlo ber tih hre turin mipui a chah. Hnahthial district bawrhsap K Vanlalruati'n thu a sawi bawk.