Tun thla chhungin Champhai dist-ah Ruihhlo vangin mi 27 man tawh

Champhai Police leh Excise & Narcotics department mi leh sate chuan tun October thla kal mekah ruihhlo kaihhnawihah mi 27 an man tawh a, thubuai 17 an ziak lut tawh.

Champhai District Narco Coordination (NCORD) Committee chuan nimin khan chairman Mohammad Aaquib, district bawrhsap kaihhruaiin Police, END leh Assam Rifles ten ruihhlo donaa hma an lak dan leh hmachhawp an thlir a; ruihhlo leh zûk leh hmuam donaa Social Welfare department leh Education department hmalaknate an sawiho bawk.

Ṭhutkhawma tarlan danin, Champhai Police-te'n October thla kal mekah heroin kaihhnawihah thubuai pasarih ziak lut tawhin, mi 18 bakah ruihhlo phurhna lirthei pathum an man tawh a; heroin an man zat chu kg 4.638 a ni.

October thla kal mek chhungin Excise & Narcotics enforcement-te'n heroin kg 1.08, methamphetamine gram 12.221 leh alprazolam gram 43.5 an man tawh a; NDPS Act hnuaiah thubuai 10 ziak lutin, mi pakua leh lirthei pahnih an man tawh bawk.