ATI-in Graduation Day an hmang

Mizoram UPC Pathian thu zirna, Apostolic Theological Institute (ATI) chuan nimin khan Graduation Day an hmang a; Mizoram UPC general superintendent Rev. P Lalrinawma’n graduate thar mi pakua hnenah Bachelor of Theology (B.Th.) certificate a hlan.

Graduation Day inkhawm hi ATI principal Rev. Ngurthanpara Sailo-in a kaihruai a, ATI Board chairman Upa Vanlalruata, Mizoram UPC executive chairman Upa F Lalremmawia leh ATI Students Union president Ramdinmawia ten thu an sawi bakah, dean Rev. B Lalchhanhima'n an dinhmun tlangpui a sawi. Zirlai graduate thar zinga ti ṭha ber Lamminlen Kipgen hnenah DL Nunpuia Award leh Vanlalthlangdika Award hlan a ni.

ATI-ah zirlai 49 awm an awm mek a, first year zirlai 21, second year zirlai 19 leh third year zirlai pakua an ni.