KHAWTHLIR

Anti-Corruption awareness buatsaih

Anti Corruption Bureau (ACB) chuan Vigilance Awareness Week pualin nimin khan Institute of Advanced Studeis in Education (IASE)-ah 'Anti-Corruption Awareness cum Signature Campaign' an buatsaih. Campaign-ah hian IASE zirlai 250 vel an tel a; ACB additoinal SP Zarzoliana leh sub-inspector Lawmsiama Hlawndo ten eirûkna nihphung leh a nghawngte an hrilhfiah a, zawhna leh chhanna hun hman a ni. Zirlai ṭhahnem takin eirûkna leh hlemhletna laka fihlim tura intiamin hming an ziak bawk.

Sunday School Ni

Naktuk Pathianni, November 2 hi Khawvel Sunday School Ni a ni a, sunday school hrang hrangah hman a ni dawn. Presbyterian Kohhran chuan puitlingah 'Fanau enkawl' tih an zir dawn a, Intermediate aṭanga senrio depatrment-te'n 'Tleirawlte leh social media tih an zir ang a, Beginner department aṭanga Junior department-te'n 'Thuawihna' tih an zir ang. Mizo Sunday School Union hnuaiah sunday school 1,035, zirlai 4,27,261, zirtirtu 55,480 leh hotu 6,031 an awm mek a ni.

College Week khâr

Johnson College chuan October 30, Ningani khan College Week kharna hun an hmang a, MLA Robert Romawia Royte-in a hmanpui. Robert Romawia chuan, tunlaiin social media-ah mipa âncheh tak tak an tam tih sawiin, "Nu âncheh aiin pa âncheh an tam zawk ta mai hi a pawi a, rilru dik leh mi dangte tana ṭha duhsak thei nih hi hlawhtlinna a ni," a ti a; zirna-inah ruihhlo do a ṭul tawh thu a sawi bawk.

Thlasik thlai chin dan inzirtir

KVK, Khawzawl chuan nimin khan Rabi Campaign pualin Dulte leh Puilo khuaa kut hnathawktute thlasik thlai chin dan an zirtir a; kut hnathawktu Dulte aṭangin mi 55 leh Puilo aṭangin mi 37 an tel. Campaign-ah hian ICAR-Indian Institute of Horticultural Research, Bengaluru leh Indian Agricultural Research Institute (IARI), New Delhi aṭanga hmuh thlai chi sem nghal a ni.