Power Minister-in Synod Hospital-ah Kawlphetha tihchangtlun dan tur a en

Power & Electricity minister F Rodingliana chuan nimin zing khan Synod Hospital, Durtlang a tlawh a, kawlphetha changtlung zawka an neih dan tur a en.

F Rodingliana hian Synod Hospital-a thawktute kâwmin, kawlphethaa harsatna an neihte a en. Synod Hospital hi Durtlang South 11KV feeder aṭangin kawlphetha pek mek a ni a, he feeder hian ATC thlengin a châwm. Synod Hospital-in kawlphetha a hmuh ṭhat loh chhan lian pakhat chu - Leitan leh a chhehvela thli tleh nasa ṭhinin 11kv bare conductor hrui a tihchhiat leh a sûk nasat lutuk vang a ni a; chumi pumpelh nan chuan aerial bunching cable (ABC) thlung tura hmalak a ni.

Power Minister chuan, ABC thlun hna chu thla khat chhunga zo turin a hriattir a; thlun zawh a nih hunah chuan Synod Hospital leh a bul vela harsatnatna tam tak a phuhrûk beisei a ni. Synod Hospital lam inhuam dan azirin anmahni chauh châwmtu tur dedicated feeder neih dan tur ruahmanna Power Minister chuan a siampui bawk.

F Rodingliana chuan, PE department-in Synod Hospital châwmtu tur solar power plant man loa estimate siamsak an inhuam tih thawktute a hrilih a, "Hospital ṭhang zel tur atana kawlphetha mamawh projected load growth zir chiang tur engineer rawn tirh a ni ang," a ti.