Angikaar Campaign khârna hun hmang

Urban Development & Poverty Alleviation (UDPA) department chuan nimin khan Lammualah in sak ṭanpuina, PMAY-U hnuaia ‘Angikaar Campaign’ an buatsaih kharna inkhawm an hmang a, Aizawl bawrhsap Lalhriatpuia'n hmanpuiin, PMAY-U hnuaia intihsiakna lawmman a sem.

Lalhriatpuia chuan, kum 2047-a India ramin ram changkang ‘Vikshit Bharat’ (Developed India) nih a tumnaah mi tinin chenna in ṭha an neih ṭheuh a pawimawh thu a sawi a, "Chumi tihlawhtling tur chuan PMAY-U Housing for All hi Mizoramah kum 2016 aṭangin ṭha taka kalpui a ni," a ti a; Rinkson Entertainment siam 'PMAY-Urban Awareness Video' leh Faith Pictures siam 'PMAY-U Mission Documentary'-te a tlangzarh.

UDPA director Jacob Lalawmpuia sawi danin, Angikaar Campaign-in a tum chu PMAY-U hnuaia in sak mekte sak zawh thuai te, geo-tagging hmanga in sak endik leh ṭanpuina dawng turte'n pawisa an dawn zung zung theihna tura campaign hmanga beihpui thlakte a ni.