State Anti-Tobacco Day hman a ni

Nimin khan Mizorama khawpui hrang hrangah Mizoram State Anti-Tobacco Day vawi 12-na hman a ni a; Health & Family Welfare minister Lalrinpuii chuan DHME Auditorium-ah Anti Tobacco Day puala buatsaih 'Tobacco-free Youth Campaign 3.0' a hawng.

Health Minister chuan, Tobacco-free Youth Campaign-in a tum ber chu - Mizorama khua leh zirna-in a tam thei ang ber vaihlo leh a kaihhnawih awm lohna hmuna siam a nih thu a sawi a, "Department zirchiannain a tarlan danin, ruihhlo ngawlvei tam ber chu zûk leh hmuam aṭanga bul ṭan an ni a, middle school naupangte zingah pawh zûk leh hmuam leh, damdawi tite hial pawh an awm," a ti.

Vaihlo zûk leh hmuam tihin rilru leh taksa hriselna a nghawng thu sawiin Lalrinpuii chuan, "Kan chhehvel boruak leh mimal leh chhungkaw sum enkawl dan thlengin ni tin nun a nghawng," a ti a; mahni zâwn ṭheuhah campaign a hlawhtlin theih nana theihtawp chhuah turin kal khawmte a chah.

Inkhawm hi Health Services joint secretary Lalnunmawii Ralte-in a kaihruai a; National Tobacco Control Programme nodal offcier Dr Zoramthangi'n thupui Zûk leh hmuam tel lo nun dan changkang’ tih a sawi.

Tobacco-free Youth Campaign 3.0 hawnna inkhawmah hian School Education director Angela Zothanpuii leh Rural Development director K Lalrohlua ten thupui thlan an sawi a; Indian Society on Tobacco and Health, Mizoram treasurer Lalbiaksangi kaihhruaiin kal khawmten TFYC thutiam an sawi rual bawk.