Aizawl-Kawnpui tlang kawnga lirthei tlan dan tur siam thar a ni

Aizawl SP Rex Zarzoliana Vanchhawng chuan hriattirna chhuahin, Aizawl - Kawnpui via Lungdai kawng siam mekah Sihphir khaw chhungah hna thawh ṭan tum a nih avangin lirthei tlan dan tur ruahman thar a nih thu a tarlang.

Aizawl SP chuan, "Tluang tak leh ngawrh taka hna thawh a nih theih nan November 3, 2025 aṭanga hman ṭan turin lirthei tlan dan tur siam a ni," a ti a; thupek bawhchhiate chu MV Act, 1988 hmanga hrem theih an nih thu a tarlang bawk.

Aizawl-Kawnpui via Lungdai kawngah hian November 3, 2025 zing dar 7 aṭangin kawng siam zawh a nih hma chuan lirthei lian (HMV) tlan phal a ni lo. MMV chin hnuai lam, Aizawl aṭanga Kawnpui pan turte chu Sihphir Lower Lane Road-ah tlan tur a ni a, Kawnpui aṭanga Aizawl pan turte chu Sihphir Bypass Road-ah tlan tur a ni.