Minister-in Kolasib DIET hostel a hawng

Education minister Dr Vanlalthlana chuan nimin khan Kolasib-ah District Institute of Education and Training (DIET) hostel thar a hawng a; Diakkawn High School-ah zirlai naupangte pualin 'Meet Your Minister' buatsaih a ni.

Dr Vanlalthlana chuan, DIET zirlaite chu nakin lawka zirtirtu la ni tur an nih avangin zirtirtu hna zahawm tak thawk tura an inbuatsaihna a ngaih thu sawiin, "Zirtirtute chu naupangte hmangaihna dik tak nei, naupangte hlimnaa hlimpui thei leh an ṭahnaah pawh ṭahpui thei tur khawpa inpekna thûk nei a nih a ngai," a ti.

Zirtirtute'n rilru paukhauh leh inpekna tak tak an neih a pawimawh thu sawiin Education Minister chuan, hun vawn dik kawngah te, posting-na hmun apianga lungawi taka thawk tur leh an hnathawhna hmun apiang tihhmasawn tuma ṭan la turin zirtirtu ni tura inbuatsaih mekte a chah.

Kolasib DIET hostel hi PAB Approval 2019-20 aṭanga hmuh Rs 2,21,46,637.50 senga sak a ni.

Education Minister hian Diakkawn High School-ah Diakkawn H/S leh Kolasib H/S zirlaite pualin 'Meet Your Minister' hun a buatsaih a; zirlaite chu mi hlawhtlingte hlawhtlinna chauh en loin, an tumruhna leh kawng hrehawm an zawh dan aṭanga inzir tur te, hlawhchhamna chu hlawhtlinna kawnga kaltlang ngei ngei tur a nih avangin beidawng loin bei zel ṭhin turtein a fuih.

Meet Your Minister tih hun hmannaah hian zirlaite chuan Minister chu zawhna hrang hrang zawtin an inkâwm a ni.