KHAWTHLIR

KṬP-te'n thisen pe

November 1, Inrinni khan KṬP, Republic Vengthlang Branch chuan ZMCH tan thisen unit 44 an pe a, petute mipa 38 leh hmeichhia paruk an ni. KṬP, Dinthar Branch pawhin Civil Hospital, Aizawl tan thisen unit 39 an pe a, petute mipa 36 leh hmeichhia pathum an ni.

Meizial man

Champhai Police-te chuan November 1, Inrinni zan khan Chawngtlai khaw daiah Scorpio MZ/01 D-0777 aṭangin ram dang meizial báwmpui (case) 38 an man a, Rs 12,10,000 hûa chhût a ni. Scorpio khalhtu Nangpiankhuala (26) s/o Chinsuanpauva, New Champhai pawh police-in an man nghal. Nangpiankhuala sawi danin, Chhungte khaw dai aṭangin miin a motor an hmang a, foreign cigarette chu Lungleia dah tur a ni.

Chetsualnaah thi

Nimin zing dar 7 vel khan Vaivakawn Zohnuai huam chhung, Sairang panna kawngah Assam Rifles recovery van leh Lalṭhakima, Chaung-U, Myanmar khaw mi khalh bike an insu a, a hmunah Lalṭhakima a thi. Lalṭhakima hi Hunthar Venga a chhungte ina awm a ni a, police-in tih tur ṭul angte an buaipui nghal a ni.

Anti-Tobacco Day

Lawngtlai District Tobacco Control Cell chuan October 31, 2025 khan CMO conference hall-ah Mizoram State Anti-Tobacco Day vawi 12-na hmang a, CMO Dr Paul Lalchungnunga'n 'Tobacco Free Youth Campaign 3.0' a hawng. Tarlan danin, Lawngtlai district-a Tobacco Cessation Clinic-ah zûk leh hmuam nghei duh mi 462 an inziak lut tawh. April 2024 - September 2025 chhungin phal lohna hmuna mei zu mi 11 man an ni a, an pawisa chawi tling khawm chu Rs 1,850 a ni.

EFCI-in hmeichhe Inkhawmpui hmang

Evangelical Free Church of India (EFCI) Mizoram Region-a presbytery (bial) pali-ah October 31, 2025 aṭang khan Presbytery Kristian Hmeichhe Pawl (PKHP)-te'n annual conference an hmang a, nizan khan a ṭiak. Inkhawmpui hi Ramhlun Venglai, Phainuam, Phuaibuang leh Vaitinah te hman a ni.