Mizorama jail 10-ah mi 1,888 an táng mek

Mizoramah jail 11 awmin, mi 1,496 tàn theihna tura ruahman a ni a, October 31, 2025 dinhmun angin táng 1,888 an awm mek a, nu tàn vanga jail-a awm ve naupang 15 nen jail-ah mi 1,903 an awm mek.

Prison department-in Mizorama jail 11 dinhmun a tarlan danin, October 31 khan jail 11 zinga 10-ah táng an awm a, mipa 1,668 leh hmeichhia 220 an ni. Táng awm mekna jail 10-te chu mi 1,428 tàn theihna tura ruahman ni mah se, naupang awm telte chhiar telin awm mek zat hi táng thei tura ruahman zat aiin 460-in an tam zawk.

Saitual District Jail-ah táng an awm lo a, a bak jail dang 10-ah táng mipa 1,668 leh hmeichhia 220 an awm a, nute tàn vangin jail pangaah naupang 15 an awm. Jail-a naupang awm mek dan chu - Central Women Jail-ah pariat, Champhai District Jail-ah pathum, Serchhip District Jail-ah pahnih, Lunglei leh Kolasib district jail-ah pakhat ve ve a ni.

Táng awm mekna jail 10 zinga pangaah táng thei tura ruahman aia tam an táng a, jail dang pangaah táng thei tur zat ruahman aia tlem an táng mek. Mi 480 tàn theihna tura duan Central Jail-ah mi 922 táng mekin, ruahman zat aia táng tamna 442 a ni a, táng thei zat ruahman aia táng mek zat tam berna a ni.

Jail 10-a táng zingah hrehawm taka táng tura hrem mi 376 an awm a, mipa 347 leh hmeichhia 29 an ni.